لاہور(سپورٹس رپورٹر) پاکستان اور آسٹریلیا کی کرکٹ ٹیموں کے درمیان دوسرا اور آخری ٹیسٹ میچ کل سے 20 اکتوبر تک ابوظہبی میں کھیلا جائیگا۔ اس سے قبل دونوں ٹیموں کے درمیان پہلا میچ بغیر کسی فیصلہ کے ختم ہوگیا تھا۔ دونوں ٹیموں کے درمیان اب تک کھیلے گئے باہمی ٹیسٹ میچز میں کینگروز کا پلڑا بھاری ہے، دونوں ٹیموں کے درمیان مجموعی طور پر 63 ٹیسٹ میچز کھیلے گئے جن میں آسٹریلوی ٹیم 31 اور پاکستانی ٹیم 14 میں کامیاب رہی۔اس بات کے روشن امکان ہیں کہ آسٹریلیا کے خلاف دوسرے ٹیسٹ میں پاکستانی ٹیم انتظامیہ اوپنر فخر زمان اور فاسٹ بائولر میر حمزہ کو ٹیسٹ کیپ دے گی۔فخر زمان ایشیا کپ میں بری طرح ناکام ہوئے تھے جبکہ لیفٹ آرم فاسٹ بائولر میر حمزہ پہلی بار پاکستان کے لیے انٹر نیشنل میچ کھیلیں گے۔پاکستانی ٹیم دوسرا ٹیسٹ کھیلنے دبئی سے ابوظہبی پہنچ چکی ہے، ہفتے کو فخر زمان پریکٹس کیلئے گراؤنڈ پہنچے۔ پاکستانی ٹیم نے دوسرے ٹیسٹ سے قبل گزشتہ روز بھی شیخ زاید سٹیڈیم میں پریکٹس سیشن میں شرکت کی‘کوچز نے دوسرے ٹیسٹ میں کامیابی حاصل کرنے کیلئے حکمت عملی تیار کرلی ہے ۔ کھلاڑیوں نے کوچز کی زیر نگرانی پریکٹس میں حصہ لیا‘بائولنگ ‘بیٹنگ اور فیلڈنگ پر زیادہ توجہ دی گئی۔ ذرائع کا کہنا ہے کہ زخمی امام الحق کی جگہ اننگز کا آغاز فخر زمان اور محمد حفیظ کریں گے جبکہ آؤٹ آف فارم وہاب ریاض کی جگہ میر حمزہ لیں گے۔ایشیا کپ میں فخر زمان ہانگ کانگ کے خلاف 24 اور بھارت کے خلاف 31 رنز بناسکے تھے۔ دو میچوں میں وہ صفر پر آؤٹ ہوئے تھے۔ ایشیا کپ کی ناکامی کے باوجود انتظامیہ فخر زمان کو ٹیم کے اتھ رکھ رہی ہے۔26 سالہ میر حمزہ کا تعلق کراچی کے علاقے میٹروول سائٹ سے ہے اور وہ پاکستان کی جانب سے پہلا ٹیسٹ کھیلیں گے۔ تاہم وہ 56 فرسٹ کلاس میچز میں 278 وکٹیں حاصل کر چکے ہیں۔حسن علی اور فہیم اشرف کی موجودگی میں ٹیم انتظامیہ میر حمزہ کو اہمیت دے رہی ہے۔