پشاور (نوائے وقت رپورٹ) نگران وزیراعلیٰ خیبر پی کے ارشد حسین شاہ کی تقرری ہائیکورٹ میں چیلنج کر دی گئی۔ درخواست گزار نے اپنے موقف میں کہا ہے کہ جس طریقے سے نگران وزیراعلیٰ کی تقرری کی گئی آئین میں اس طرح تعیناتی کا کوئی وجود نہیں، آرٹیکل 224 اور 224 اے نارمل حالات میں نگران وزیراعلیٰ کی تعیناتی کے لئے ہیں۔ اس وقت جو حالات تھے یہ نارمل نہیں تھے اس طرح تعیناتی نہیں ہو سکتی تھی۔ درخواست میں مؤقف اختیار کیا گیا ہے کہ محمود خان اس وقت وزیراعلیٰ نہیں اور نہ اکرم خان درانی اپوزیشن لیڈر ہے، محمود خان اور اکرم خان درانی کے پاس کوئی عہدہ نہیں ہے یہ عام لوگ ہیں، نارمل حالات نہ ہوں تو پھر گورنر اور الیکشن کمشن کی مشاورت سے نگران وزیراعلیٰ کی تعیناتی ہو گی۔ درخواست میں صوبائی حکومت، نگران وزیراعلیٰ، سابق وزیراعلیٰ محمود خان، اپوزیشن لیڈر اکرم خان درانی کو فریق بنایا گیا ہے۔