ہائیکورٹ: غیر ضروری اپیل دائر کرنے پر درخواستگزار کو 10 لاکھ روپے جرمانہ

 لاہور (خبر نگار) لاہور ہائیکورٹ کے 2 رکنی بینچ نے غیر ضروری اپیل دائر کرنے پر درخواست گزار کو 10 لاکھ روپے جرمانہ کر تے ہوئے سنگل بینچ کے فیصلے کے خلاف اپیل خارج کر دی۔ درخواست گزار نے رائٹ ٹو انفارمیشن ایکٹ کے تحت ایکسائز ڈیپارٹمنٹ سے ٹیکس پیئرز کی تفصیلات لینے کے لئے رجوع کیا تھا۔ عدالتی فیصلے میں کہا گیا ہے کہ انفارمیشن کمیشن نے ایکسائز کو متعلقہ معلومات فراہم کرنے کا حکم دیا۔ ایکسائز کی جانب سے ٹیکس پیئرز کی ذاتی انفارمیشن کے علاوہ باقی معلومات فراہم کر دی گئیں۔ درخواست گزار نے ٹیکس پیئرز کی معلومات لینے کی بھی استدعا کی۔ ایکسائز نے متعلقہ ٹیکس پیئرز کی ذاتی انفارمیشن دینے سے انکار کر دیا۔ ایکسائز کی جانب سے انفارمیشن کمیشن کے فیصلے کو لاہور ہائیکورٹ میں چیلنج کیا گیا۔ لاہور ہائیکورٹ کے سنگل بینچ نے ایکسائز کی درخواست منظور کر لی اور انفارمیشن کمیشن کے احکامات کالعدم قرار دے دیئے۔