ایشین اتھلیٹکس چیمپئن شپ میں گولڈ میڈل جیتنا ہدف: ارشد ندیم

لاہور(سپورٹس رپورٹر)پاکستان کے اولمپئن گولڈ میڈلسٹ جیولین تھرور ارشد ندیم ایشین اتھلیٹکس چیمپئن شپ کی تیاریوں میں مصروف اور بہترین تھرو کر کے گولڈ میڈل جیتنے کیلئے پْرعزم ہیں۔وہ ان دنوںپنجاب سٹیڈیم لاہور میں ٹریننگ کر رہے ہیں۔انہوںنے کہا کہ 5 ماہ سے سخت محنت کر رہا ہوں، اولمپکس کے بعد پہلا بڑا ایونٹ ہے، ایشین چیمپئن شپ 27 سے 31 مئی تک کوریا میں ہوگی۔ میرا ایونٹ 31 مئی کو ہے، میرا کسی سے مقابلہ نہیں ہے میرا مقابلہ صرف ارشد ندیم سے ہوتا ہے، مجھے اپنا بہترین کرنا ہے، کسی بھی ایونٹ میں اپنا بہترین کرتا ہوں تو میں گولڈ میڈل جیتنے کی پوزیشن میں ہوتا ہوں۔ میرا ہدف ہے کہ جن ایونٹس میں گولڈ میڈل نہیں جیتا ان میں گولڈ میڈل جیتوں۔ ورلڈ، ایشین چیمپئن شپ، ایشین گیمز اور ڈائمنڈ لیگز میں گولڈ میڈلز جیتنے ہیں۔ لاس اینجلس اولمپکس 2028 میں بھی حصہ لینا ہے، ایک سال پہلے سارا فوکس اولمپکس پر ہوگا، اس سے قبل میری توجہ اس دوران ہونے والے دیگر ایونٹس پر ہے۔ کوچ سلمان اقبال بٹ نے کہا  کہ ارشد ندیم کی تیاری اچھی ہے، ایک بار پھر اچھی کارکردگی کیلئے پْرعزم ہیں کیونکہ پانچ چھ ماہ کی ٹریننگ کے دوران ہمارے ریفرنس اچھے سامنے آئے ہیں، اب ان کو برقرار رکھنا ہے۔ کچھ ثابت کرنے کی ضرورت نہیں، ہمارے لیے یہ ایک اور ایونٹ ہے ہم نے کسی ایونٹ کو چھوٹا بڑا نہیں سمجھا سب کو ایک ہی اہمیت دی ہے اور اچھا پرفارم کرنے کی کوشش کی ہے۔ دباؤ ہونا اچھی چیز ہے، دباؤ نہ ہو تو آپ پرفارم نہیں کرسکتے اضافی دباؤ سے آپ غیر معمولی کارکردگی کا مظاہرہ کرنے کی کوشش کرتے ہیں۔