اپنے بدترین دشمن کے لیے بھی موت کی دعا نہیں کرتے:مریم نواز
گجرات: مسلم لیگ (ن) کی نائب صدر مریم نواز نے کہا ہے کہ چیئرمین پی ٹی آئی نے اسٹیبلشمنٹ کا نہیں اسٹیبلشمنٹ نے عمران خان کا نمبر بلاک کردیا ہے اور جس نمبر پر وہ فون کررہا ہے وہ فون نمبر بدل گیا ہے۔ جب اس نمبر پر کال کی جاتی ہے تو جواب آتا ہے آپ کو مطلوبہ سہولت میسر نہیں۔کہا کہ ہم اپنے بدترین دشمن کے لیے بھی موت کی دعا نہیں کرتے، ہم دعا گو ہیں کہ عمران خان تم زندہ رہو اور نواز شریف کی کامیابیاں دیکھو، اگر ویڈیو ہے تو سامنے لاؤ، ہم ضمانت دیتے ہیں کہ نواز شریف تمھیں دل سے سیکیورٹی دے گا اور شہباز شریف سے زیادہ خیال رکھے گا۔
گجرات میں عوامی جلسے سے خطاب کے دوران مریم نواز نے کہا کہ مسلم لیگ (ن) عمران خان کی کوشش کامیاب نہیں ہونے دے گی، عوام سے ووٹ مانگو گے تو آواز آئے گی رانگ نمبر اور پاکستان میں اس وقت انتخابات ہوں گے جب ہمارا قائد نواز شریف فیصلہ کرے گا۔
مریم نواز نے کہا کہ یہ وہ ہی نواز شریف ہے جس نے تم سے گالیاں بھی سنیں مگر جب تم انتخابی ریلی کے دوران اسٹیج سے گرے تو تمھارا حال پوچھا لیکن تمہیں کوئی شرم نہیں ہے، تم آج بھی جھوٹ پر مبنی سیاست کررہے ہیں۔
نائب صدر مسلم لیگ (ن) نے کہا کہ نواز شریف کے خلاف تم نے ایسا کیا کیا کہ کوٹ لکھپت جیل میں انہیں کھانا دیا گیا، جس کے بعد اُن کے پلیٹ لیٹس تیزی سے گرے اور ایک ہی رات میں وہ زندگی و موت کی کشمکش میں مبتلا ہوگئے۔
