کراچی ( کامرس رپورٹر ) پاکستان اسٹاک ایکس چینج گذشتہ ہفتے کاروباری اتار چڑھائو کے بعد مندی کی لپیٹ میں رہی ،کے ایس ای100انڈیکس 1300پوائنٹس گھٹ گیا جس کی وجہ سے انڈیکس 44ہزار پوائنٹس کی نفسیاتی حدگر گیا اور 43400پوائنٹس کی پست سطح پر بند ہوا ۔کاروباری سرگرمیاں ماند رہنے سے مارکیٹ میں سرمایہ کاروں کے 2کھرب43ارب روپے سے زائد ڈوب گئے جس کے نتیجے میں سرمائے کا مجموعی حجم 74کھرب روپے سے گھٹ کر 71کھرب روپے رہ گیا جبکہ57.19فیصد حصص کی قیمتیں بھی گھٹ گئیں ۔پاکستان اسٹاک مارکیٹ گذشتہ ہفتے2دن بدترین مندی سے دوچار رہی اور اس دوران انڈیکس 2088.88پوائنٹس کم ہو گیا جبکہ3دن کی تیزی سے انڈیکس 734.53پوائنٹس ہی ریکور ہو سکا تاہم مجموعی طور پر مارکیٹ تنزلی کا شکار رہی ۔اسٹاک ماہرین کے مطابق ملک میں سیاسی افرا تفری کے باعث معاشی اشاریوں میں تنزلی کے خدشات پر سرمائے کے انخلاء ، غیر ملکی زرمبادلہ کے ذخائر میں کمی اور آئی ایم ایف پروگرا م میں تاخیر مارکیٹ کو بحرانی کیفیت سے دوچار کیا تاہم چیئرمین ایف بی آر کی جانب سے ٹیکس چھوٹ میں مزید کمی کرنے کے اعلان سے سرمایہ کاروں کو حوصلہ ملااور حصص کی خریداری سے مارکیٹ سے منفی اثرات زائل ہو گئے ۔پاکستان اسٹاک مارکیٹ میں گذشتہ ہفتے کے ایس ای 100انڈیکس میں 1354.35پوائنٹس کی کمی واقع ہوئی جس سے انڈیکس 44840.81پوائنٹس سے کم ہو کر43486.4 6پوائنٹس ہو گیا اسی طرح 606.56پوائنٹس کی کمی سے کے ایس ای30 انڈیکس 17148.53پوائنٹس سے گھٹ کر 16541.97پوائنٹس پر بند ہوا جبکہ کے ایس ای آل شیئرزانڈیکس 30480.30پوائنٹس سے کم ہو کر29573.73پوائنٹس پر بند ہوا ۔کاروباری مند ی کے سبب مارکیٹ کے سرمائے میں ایک ہفتے کے دوران 2کھرب 43ارب37کروڑ 27لاکھ41 ہز ا ر 818روپے کی کمی واقع ہوئی جس کے نتیجے میں سرمائے کا مجموعی حجم 74 کھرب 43 ارب 30 کروڑ 33 لاکھ46ہزار170روپے سے کم ہو کر71کھرب99ارب93کروڑ6لاکھ4ہزار352روپے رہ گیا ۔پاکستان اسٹاک مارکیٹ میں گذشتہ ہفتے ٹریڈنگ کے دوران ایک موقع پر انڈیکس 44841.41پوائنٹس کی بلند سطح کو چھو گیا تھا تاہم مندی کی لہر آنے سے انڈیکس 42273.27پوائنٹس کی پست سطح پر بھی ٹریڈ ہوتا دیکھا گیا ۔گذشتہ ہفتے مارکیٹ میں زیادہ سے زیادہ9ارب روپے مالیت کے 33کروڑ85لاکھ42ہزار حصص کے سودے ہوئے جبکہ کم سے کم 6ارب روپے مالیت کے 20کروڑ81لاکھ12ہزار حصص کے سودے ہوئے تھے ۔پاکستان اسٹاک مارکیٹ میں گذشتہ ہفتے کے دورا ن مجموعی طور پر 1738کمپنیوں کا کاروبارہوا جس میں سے 652کمپنیوں کے حصص کی قیمتوں میں اضافہ ،994میں کمی اور92کمپنیوں کے حصص کی قیمتوں میں استحکام رہا ۔کاروبار کے لحاظ سے لوٹے کیمیکل ،سینر جیکو پاک ،ورلڈ کال ٹیلی کام ،ٹیلی کارڈ لمیٹڈ ،غنی گلوبل ،یونٹی فوڈز لمیٹڈ ،ہم نیٹ ورک ،میپل لیف ،فوجی سیمنٹ ،ٹی آر جی پاک لمیٹڈ ،پاک ریفائنری پاک انٹر نیشنل بلک ،ٹی پی ایل پراپرٹیز ،ٹریٹ کارپوریشن ،جی تھری ٹیکنالوجی اورپاک الیکٹرون سر فہرست رہے ۔

شیریں مزاری کیس:اسلام آباد ہائی کورٹ کا حکومت کے لیے بڑا حکم