پی ایس ایل: ملتان سلطانز،لاہور قلندرز اور کراچی کنگز، کوئٹہ گلیڈی ایٹرز سے ٹکرائیں گے
اسلام آباد: پاکستان سپر لیگ (پی ایس ایل) سیزن فائیو میں آج دو میچز کھیلے جائیں گے۔
پی ایس ایل میں آخری دو پول میچز آج کھیلے جائیں گے۔ پی ایس ایل کی ٹیموں کی سیمی فائنل میں جگہ بنانے کی سر توڑ کوششیں جاری ہیں۔
پی ایس ایل فائیو میں پہلا میچ دوپہر دو بجے ملتان سلطانز اور لاہور قلندرز کے درمیان کھیلا جائے گا جو لاہور کے قذافی اسٹیڈیم میں ہو گا۔ لاہور قلندرز 4 میچ میں کامیابی کے بعد 7 پوائنٹس کے ساتھ چوتھی پوزیشن پر موجود ہے جبکہ ملتان سلطانز 14 پوائنٹس حاصل کر کے سرفہرست ہے۔
دوسرا میچ کوئٹہ گلیڈی ایٹرز اور کراچی کنگز کے درمیان شام 7 بجے نیشنل اسٹیڈیم کراچی میں کھیلا جائے گا۔ کراچی کنگز پوائنٹس ٹیبل پر دوسری پوزیشن پر موجود ہے جبکہ کوئٹہ گلیڈی ایٹرز 7 پوائنٹس کے ساتھ آخری نمبر پر موجود ہے اور آج کے میچ میں فتح کوئٹہ گلیڈی ایٹرز کے لیے انتہائی ضروری ہے۔
واضح رہے کہ گزشتہ روز کراچی کے نیشنل اسٹیڈیم میں ہونے والے ایچ بی ایل پی ایس ایل سیزن 5 کے اٹھائیسویں میچ میں کراچی کنگز نے اسلام آباد یونائیٹڈ کو 4 وکٹوں سے شکست دی۔
اسلام آباد یونائیٹڈ نے پہلے بیٹنگ کرتے ہوئے کراچی کنگز کو جیت کے لیے 137 رنز کا ہدف دیا تھا تاہم کراچی کنگز نے مقررہ ہدف آخری اوور میں حاصل کر لیا۔
کورونا وائرس کے باعث گزشتہ روز شائقین کو گراؤنڈ میں آنے کی اجازت نہیں تھی جبکہ آج کے میچز بھی گراؤنڈ میں شائقین کی موجودگی کے بغیر ہی کھیلے جائیں گے۔
