فیروزوالا(نامہ نگار) نواحی گائوں رنگیاں جھنگیاں تھانہ فیکٹری ایریا کوٹ عبدالمالک میں اغوا ہونے والا چار سالہ بچہ اغوا کے بعد قتل‘ بوری بند نعش نالہ ڈیک سے برآمد ہوئی۔ بتایا گیا ہے کہ رنگیاں جھنگیاں کے رہائشی رانا مزمل حسین کا چار سالہ بیٹا علی سبحان سات روز قبل گھر سے قریب اپنے ماموں کی دکان پر ٹافیاں خریدنے گیا، نامعلوم ملزمان نے اغوا کرلیا۔ راہگیروں نے برساتی نالہ میں بوری بند نعش دیکھی تو پولیس کو اطلاع دی جس نے نالہ سے نعش باہر نکالی جسے ورثاء نے شناخت کرلیا۔ پولیس نے نعش قبضہ میں لے کر پوسٹ مارٹم کے لیے ہسپتال منتقل کردی۔ پولیس نے اس علاقے کے ایک نوجوان کو مشکوک ہونے پر حراست میں لے کر پوچھ گچھ شروع کردی۔ جب مقتول بچے کی نعش گھر پہنچی تو کہرام مچ گیا۔