لاہور(خبر نگار)سابق چیئرمین سینٹ رضا ربانی کی گزشتہ روز لاہور آمد، مزارداتا دربار پر حاضری دی، پھولوں کی چادر چڑھائی، ملکی ترقی اور استحکام کیلئے دعا ئیں کیں۔ رضا ربانی نے پارٹی رہنمائوں سے گفتگو کرتے ہوئے کہا کہ سینٹ انتخابات ملک میں جمہوریت کے تسلسل کی طرف بڑا قدم ہے۔پیپلز پارٹی پاکستان میں جمہوریت کی علمبردار تھی، ہے اور رہے گی۔ بلاول بھٹو، ذوالفقار بھٹو اور بینظیر بھٹو کے نظریے کو آگے بڑھا رہے ہیں۔طاقت کا سرچشمہ عوام کے بنیادی نقطے پر پی پی کی جدوجہد جاری رہے گی۔ پیپلز پارٹی میں اپنا کردار ادا کرتے ہوئے، روشن خیال، ترقی پسند سوچ کو آگے بڑھاتا رہوں گا۔مزدوروں، کسانوں، طلبہ، محروم اور پسے ہوئے طبقات کے حقوق کی جنگ جاری رہے گی۔آئین اور پارلیمنٹ کی بالادستی کیلئے پیپلز پارٹی اپنے بنیادی اساس کے مطابق آگے بڑھے گی۔وفاقی اکائیوں میں ہم آہنگی اور معاشی استحکام سے ہی پاکستان ترقی کرسکتا ہے۔ اداروں میں تصادم کی فضا کے خاتمے اور ملکی استحکام کیلئے اپنا مثبت کردار ادا کرتا رہوں گا۔