را ئوانوار کا قریبی ساتھی شعیب شوٹر اغوا برائے تاوان کیس میں مفرور قرار

15 مارچ 2018

کراچی(این این آئی)نقیب اللہ قتل کیس میں ملوث اور رائو انوار کے دست راست سابق ایس ایچ او شعیب شوٹر کو اغوا برائے تاوان کے ایک مقدمے میں مفرور قرار دے دیا گیاہے۔بدھ کوکراچی کی انسدادِ دہشتگردی عدالت میں شہری کے اغوا برائے تاوان کیس کی سماعت ہوئی۔ کیس میں سابق ایس ایچ او شعیب شیخ عرف شعیب شوٹر کو مفرور قرار دے دیا گیا۔ سماعت کے دوران تفتیشی افسران نے بتایا کہ پولیس کی وردی میں ملبوس کالی بھیڑ شعیب شوٹر نے شریف نامی شہری کو اغوا کرکے اس سے 6 لاکھ روپے تاوان وصول کیا۔ تاہم پیسے لینے کے باوجود شریف کو رہا نہیں کیا گیا جو تاحال لاپتہ ہے۔شعیب شوٹر سابق ایس ایس پی ملیر رائو انوار کا قریبی ساتھی سمجھا جاتا ہے اور نقیب اللہ قتل کے مشہور مقدمے میں بھی ملوث ہے۔ پولیس نے کہا کہ سندھ ہائیکورٹ میں بھی شریف کے لاپتہ ہونے سے متعلق درخواست زیرِ سماعت ہے۔ عدالت نے ملزم شعیب شوٹر کے ناقابل ضمانت وارنٹ گرفتاری جاری کرنے کا حکم دیتے ہوئے سماعت 8 اپریل تک ملتوی کردی۔