لاہور (نیوز ڈیسک) بھارت کی حکمران جماعت بی جے پی اور سب سے بڑی اور اہم ریاست اترپردیش میں اسکے انتہاپسند ہندو وزیراعلیٰ یوگی ادتیا ناتھ کو زبردست سیاسی طمانچہ منہ پر کھانا پڑ گیا۔ گزشتہ روز بی جے پی اترپردیش میں گورکھ پور اور پھولپور کی اہم 2لوک سبھا کی سیٹیں ضمنی الیکشن میں ہار گئی، گورکھ پور کی سیٹ وزیراعلیٰ یوگی ادتیا ناتھ جبکہ پھولپور کی سیٹ نائب وزیراعلیٰ کیشو پرشاد موریہ نے خالی کی تھیں۔ یوگی ادتیا ناتھ اور بی جے پی کو سابق وزیراعلیٰ اور سماج وادی پارٹی کے سربراہ اکھلیش یادیو نے دلت رہنما اور بہوجن سماج پارٹی کی سربراہ مایا وتی کے ساتھ انتخابی مفاہمت کرکے شکست دی۔ ادھر اتر پردیش سے ملحقہ ریاست بہار میں لالو پرشاد یادیو کے جیل میں بند ہونے کے باوجود انکی جماعت راشٹریہ جنتا دل نے بھی 2 سیٹیں جیت لیں۔ لالو پرشاد چارہ سکینڈل کیس میں قید کاٹ رہے ہیں۔