فرشتہ پارٹی کا ایک پائوں زرداری‘ دوسرا عمران کے کندھے پر ہے: رانا ثنا

15 مارچ 2018

لاہور(خصوصی نامہ نگار) صوبائی وزیر قانون و پارلیمانی امور رانا ثناء اللہ خاں نے کہا ہے کہ عمران اور زرداری کی شکل میں اسٹیبلشمنٹ کا ٹولہ 2018ء میں عوامی نفرت کا شکار بنے گا، جوجوتا بازی شروع ہوئی ہے اس شدت پسندی کو ایجاد کرنے والا عمران خان ہے ،عمران خان پر جوتا اچھالنے پر انہوں نے کہا کہ جب آپ اپنے مخالفین کے خلاف گھٹیا سیاست کریں گے، جب مخالفین کے خلاف ماردو، پکڑ لو، گھسیٹ دو کی سیاست کریں گے تو کارکن فطرتی ردعمل دیں گے، پچھلے چار سال سے عمران خان اپنے مخالفین کو ایسے ہی نشانہ بنا رہا ہے۔ جوتا کلب میں ٹاپ پر شیخ رشید جائے گا کیونکہ سینکڑوں لوگ جوتے لے کر اس کے پیچھے پڑے ہیں۔ دس سال پہلے دوسری پارٹی کے رہنمائوں کو عزت دی جاتی تھی، تمام لوگ اس روش کو روکنے کے لیے اپنا کردار ادا کریں وگرنہ حالات درست نہیں ہوتے نظر آتے، عمران خان منفی سیاست کی معافی مانگیں۔ انہوں نے کہاکہ میرے حلقے کے لوگوں نے عمران کے بیان پر اسے جوتا مارنے کا کہا ہے، میں کسی کو کچھ نہیں کہتا کہ وہ ایسا عمل کرے، محمد رمضان (ن) لیگ کا سپورٹر ضرور ہے مگر اسے میں نے یا میرے بیٹے نے نہیں بھیجا۔ میاں صاحب کے ساتھ واقعے کے بعد جوتا مارنے گیا مگر دوتھپڑ ہی مارسکا، اس نے کہا کہ لکی شاہ اور راجہ ضرار کے تشدد کے باعث رانا ثناء اللہ اور بیٹے کا نام لیا۔ عمران خان اپنے کارکنوں کو اگر ایسی تربیت دیں گے تو معاملہ بگڑے گا۔ 2018کے انتخابات میں انجینئرنگ نہیں ہوسکتی، سو کی انجینئرنگ ہوسکتی لاکھوں کی نہیں ہوسکتی اگر کوشش کی گئی تو وہ الٹی پڑ سکتی ہے۔ آصف زرداری اسٹیبلشمنٹ کی لونڈی اور عمران خان اسٹیبلشمنٹ کا مہرہ ہیں، سب پر بھاری زرداری پر وہ نامعلوم پارٹی بھاری ہوگئی ہے، عمران پر بھی وہ پارٹی زیادہ حاوی ہوگئی ہے، اب نامعلوم یا فرشتہ پارٹی کا ایک پائوں زرداری اور دوسرا عمران خان کے کندھے پر ہے۔