پاکستان پیپلز پارٹی (پی پی پی) کے چیئرمین بلاول بھٹو زرداری نے حکومت پر تنقید کرتے ہوئے واضح طور پر کہا ہے کہ جتنا دباؤ ڈالنا ہے ڈال لو پیپلز پارٹی جھکنے اور ڈرنے والی نہیں ہے۔

لاہور میں صحافیوں سے بات کرتے ہوئے ان کا کہنا تھا کہ نئے پاکستان کے نئے پنجاب کی صورتحال سب کے سامنے ہے، نالائق حکومت نے ملک کے سب سے بڑے صوبے کے لیے نالائق وزیراعلیٰ منتخب کیا، وفاق جس طرح صوبوں کے وسائل و حقوق پر ڈاکہ ڈال رہا ہے اور پنجاب میں جو معاشی حملے ہورہے ہیں یہ عوام کے ساتھ سب سے بڑی نا انصافی ہے۔

ان کا کہنا تھا کہ پرانے پاکستان میں پنجاب کا بجٹ 60 کھرب ہوتا تھا وہ اب نئے پاکستان میں 23 کھرب ہوگیا ہے، اس کٹوتی کا بوجھ یہاں کے عوام، غریب، کسان، بے روزگار نواجون کو اٹھانا پڑے گا۔

بلاول بھٹو کا کہنا تھا کہ ماہر اقتصادیات خبردار کر رہے ہیں کہ اگر پی ٹی آئی کی حکومت آئی ایم ایف بجٹ کو منظور کرتی ہے تو 80 لاکھ لوگ غربت کی لکیر سے نیچے ہوں گے، حکومت غریبوں، مظلوموں کا حق ماررہی ہے اور امیر ترین لوگوں چوروں ڈاکووں کے لیے ایمنسٹی اسکیم دی جاتی ہے لیکن غریبوں، کسانوں، مزدوروں کے لیے کوئی ایسی اسکیم نہیں۔

انہوں نے کہا کہ ہر صوبے کا بجٹ کم کیا جارہا اس سے زیادہ ظلم کیا ہوسکتا ہے،پاکستان کے عوام بہت بہادر ہیں اور ملک کے لیے قربانی دینے کو تیار ہیں لیکن جب صاف نظر آئے کہ امیروں کے لیے بیل آؤٹ اور ایمنسٹی جبکہ مظلوم پاکستانیوں کے لیے مہنگائی، غربت اور بے روزگاری ہو تو پھر یہ ایک نہیں 2 پاکستان ہیں، اس کے خلاف آواز بلند کرنا پیپلزپارٹی کا فرض ہے,اگر پارلیمنٹ کو اسی طرح چلایا گیا تو آمر اور نئے پاکستان میں کیا فرق ہے۔ جمہوری حقوق پر حملے ہو رہے ہیں۔

چیئرمین پی پی پی کا کہنا تھا کہ عوام کے حقوق پر حملے کیے جارہے، پیپلزپارٹی اس معاشی دہشت گردی کو برداشت نہیں کرے گی، پہلے بھی کہا تھا کہ اگر یہ لوگ عوام دشمن بجٹ پیش کرتے ہیں تو پیپلز پارٹی سڑکوں پر نکلنے گی اور عوامی رابطہ مہم شروع کرنے پر مجبور ہوگی۔

اپنی بات جاری رکھتے ہوئے بلاول بھٹو نے کہا کہ ہم نے عوام دوست بجٹ پیش کرنے کا موقع دیا لیکن جس طرح کا عوام دشمن بجٹ پیش ہوا یہ اس ملک کی معاشی خود کشی ہے، عمران خان نے کہا تھا کہ وہ آئی ایم ایف نہیں جائیں گے لیکن انہوں نے وہاں جاکر پورے ملک کو معاشی خود کشی کروا دی، ملک کےوزیراعظم کوسفارتی آداب کابھی علم نہیں، ۔

بلاول بھٹو  نے کہا پہلےبھی کہاتھاعوام دشمن بجٹ پیش کیاگیاتوہم سڑکوں پرنکلیں گے، آصف زرداری کوبجٹ سےایک دن پہلےگرفتارکیاگیا، ہمارے پاس موقع  تھا آصف زرداری کی گرفتاری پرایوان کابائیکاٹ کرتے، عوام دشمن بجٹ ملک کی معاشی خودکشی ہے۔

بلاول بھٹو کا کہنا تھا کہ ہمارے جمہوری اور انسانی حقوق پر جو حملے ہورہے ہیں، اس کے خلاف آواز اٹھانا ہمارا فرض ہے، 1973 کا آئین، 18 ویں ترمیم اور ہمارے جمہوری حقوق حقوق پر حملے کیے جارہے ہیں، ہم یہ برداشت نہیں کریں گے۔

انھوں نے کہا کہ عمران خان نےکہاتھاوہ آئی ایم ایف کےپاس نہیں جائیں گے، لیکن انہوں نے آئی ایم ایف کے پاس جا کر ساری عوام کو معاشی خودکشی پر مجبور کر دیا ہے،  ملکی مسائل پرآوازاٹھاناہم سب کافرض ہے، عوام دشمن بجٹ کومستردکرتےہیں، آج ایک نہیں دوپاکستان ہیں اور ہم اس کےخلاف ہیں، ہم  نےہمیشہ جمہوری حقوق کیلئےجدوجہدکی ہے

پی پی چیئرمین کا کہنا تھا یہ فاشسٹ حکومت ہے جس کا وزیر کہتا ہے کہ حالات ٹھیک کرنے کے لئے 6 ہزار افراد کو پھانسی دے دو۔ حکومت نے اپوزیشن کیخلاف آپریشن شروع کیا ہے کیونکہ اسے علم ہے کہ آصف زرداری سب کو ایک پلیٹ فارم پر اکٹھے کر سکتے ہیں،  حکومت کا دباؤ نہ صرف ہم پر بلکہ تمام سیاسی جماعتوں پر ہے،  چیئرمین نیب نے ایک فقرہ کہہ دیا تو اس پر اور عدلیہ پر بھی دباؤ ڈال دیا گیا۔

انہوں نے مزید کہا کہ پہلے بھی واضح طور پر کہا تھا کہ جتنے کیسز بنانے ہیں بنا دیں، میرے پورے خاندان، پارٹی کو جیل بھیجنا ہے بھیج دیں مگر پیپلز پارٹی جمہوریت، 1973 کے آئین، انسانی و معاشی حقوق، صحافت کی آزادی، فوجی عدالتوں، لاپتہ افراد کے معاملے پر اپنا موقف نہیں بدلے گی، جتنا دباؤ ڈالنا ہے ڈالو جو کرنا ہے کرلو پیپلزپارٹی نظریاتی جماعت ہے، یہ ذوالفقار بھٹو اور بینظیر بھٹو کی جماعت ہے یہ جھکنے والی، بکنے والی اور ڈرنے والی جماعت نہیں ہے۔

صحافیوں سے گفتگو میں ان کا کہنا تھا کہ پیپلزپارٹی نے کارکنوں کے ساتھ مل کر 50 سال جدوجہد کی، ہمارے کارکن سے قیادت تک ساتھ ہوتے ہیں مگر ہم اپنے نظریہ، موقف، اصولوں پر یوٹرن یا سمجھوتہ نہیں کرتے۔

بلاول بھٹو نے کہا آمر اور کٹھ پتلی عمران خان کے نئے پاکستان میں فرق کیا ہے، یہ صحافی اگر مجھ سے وہ سوال نہیں پوچھ سکتے جو وہ پوچھنا چاہتے ہیں، اگر صحافت، انسانی حقوق کی آزادی، قانون کی بالادستی اور آزاد عدلیہ نہیں ہے تو ان آمر اور نئے پاکستان میں کیا فرق ہے، پاکستانیوں کو مل کر جدوجہد کرنا پڑے گا۔

چیئرمین پیپلز پارٹی نے کہا کہ پاکستان کے بہت مسائل ہیں، جن کا حل ایک آدمی نہیں نکال سکتا، ہم سب مل کر پاکستان کے مسائل کا حل نکالیں گے۔

اس موقع پر سوالات کے جوابات دیتے ہوئے کسی کی حد سے زیادہ حمایت نہیں کی، میں ہمیشہ اپنی جماعت کی حمایت کرتا ہوں لیکن میں ان اصولوں پر عمل کرتا ہوں جو ذوالفقار علی بھٹو، بینظیر بھٹو اور آصف زرداری کے ہیں اور جہاں تک پی ٹی ایم اراکین کی بات ہے تو میں ان کے بنیادی اور انسانی حق ہر پاکستانی کا ایک جیسا ہونا چاہیے آپ کو بولنے اور اپنا موقف پیش کرنے کی آزادی ہو، اگر آپ رکن قومی اسمبلی ہیں تو یہ حق ہے کہ آپ کا پروڈکشن آرڈر جاری ہو۔

بات کو جاری رکھتے ہوئے انہوں نے کہا کہ شمالی و جنوبی وزیرستان، لاہور کے نمائندوں کو جیل میں ڈال کر انہیں پورے بجٹ عمل سے باہر رکھنا غیر آئینی و غیر قانونی ہے۔

بلاول بھٹو کا کہنا تھا کہ  کٹھ پتلی حکومت کے پاس مسائل کاحل نہیں، مل کر حل نکالنا ہوگا، عیدکے بعد عوامی رابطہ مہم چلانے کا فیصلہ کیاگیا تھا، کرپشن  کے الزامات صرف ہم پرہیں، چیئرمین نیب تو ان کا ہرحکم مانتے تھے پھر بھی ان کیخلاف بھی سازش کی گئی۔

مریم نواز سے ملاقات سے متعلق سوال پر ان کا کہنا تھا کہ آج صبح مریم نواز نے ظہرانے کی دعوت دی ہے، جسے میں قبول کروں گا، پاکستان کے اتنے مسائل ہیں کہ سب نے مل کر اس کا حل نکالنا ہے، سب نے مل کر معاشی، انسانی و جمہوری حقوق کو تحفظ پہنچانا ہے، ہم سب نے مل کر پی ٹی آئی، آئی ایم ایف کے بجٹ کو روکنا ہے اور ملک کو معاشی خود کشی سے بچانا ہے۔

بلاول بھٹو زرداری کا کہنا تھا کہ پیپلزپارٹی کا مسلم لیگ (ن) اور پی ٹی آئی کے ساتھ نظریاتی معاملات ہیں لیکن ملکی مفاد میں مل کر کام کرنے کو تیار ہیں مگر یہ کٹھ پتلی حکومت اصل میں سنجیدہ نہیں، لہٰذا پھر ان سے بات کروں گا جو عوام کے حقوق کے تحفظ میں سنجیدہ ہیں۔

انھوں نے مزید کہا جلدتمام جماعتوں کی اے پی سی ہوگی اورمستقبل کالائحہ عمل طےکیاجائے گا، ہم صرف یہ کہتےہیں پارلیمان کواپنی مدت پوری کرنی چاہیے۔