بھارت سے درآمد کیا جانیوالا 30 فیصد خشک دودھ ناقابل استعمال ہے : قائمہ کمیٹی

15 اپریل 2018

اسلام آباد(آن لائن)قومی اسمبلی قائمہ کمیٹی برائے بین الصوبائی رابطہ میں انکشاف کیا گیا ہے کہ پاکستان میں سب سے زیادہ خشک دودھ بھارت سے آ رہا ہے جبکہ بیرون ممالک سے درآمد کیے جانے والا 30 فیصد دودھ ناقابل ہضم ہے۔ہفتہ کو چیئرمین عبدالقہار خان کی صدارت میں اجلاس ہواجس میں لائیوسٹاک اور ڈیری ڈویلپمنٹ کے حوالے سے تفصیلی جائزہ لیا گیا۔ سیکرٹری لائیوسٹاک پنجاب نے بریفنگ دیتے ہوئے بتایاکہ گزشتہ دس سال میں ہماری گوشت کی برآمدات منفی ہیں۔سیکرٹری لائیوسٹاک پنجاب نے یو این کام ٹریڈ کی رپورٹ کاحوالہ دیتے ہوئے کہاکہ پاکستان میںسب سے زیادہ خشک دودھ بھارت سے آ رہا ہے،بلوچستان میں لائیوسٹاک کے 600 ڈاکٹرز بیروزگار ہیں،ہم سی پیک کے لیے آنیوالے چینی باشندوں کو حلال فوڈ مہیا کریں گے،پنجاب میں زراعت کا مستقبل نہیں،ہم نے کانگو جیسے مسئلے پر 100فیصد قابو پالیا ہے۔اجلاس میں وفاقی وزیر ریاض پیرزادہ نے کہاکہ لائیوسٹاک زراعت کی ریڑھ کی ہڈی ہے،میری تین سال فصل نہیں ہوئی،میں نے اپنا خرچہ جانور بیچ کر پورا کیا۔کمیٹی نے وزارت بین الصوبائی رابطہ کو لائیوسٹاک سے متعلق کانفرنس کرنے کی ہدایت کردی۔