پنجاب میں کلین اینڈ گرین مہم کیلئے مقابلے کرانے کا اعلان ‘پیار سے کام لیتا ہوں‘ طریقے سارے آتے ہیں : عثمان بزدار
لاہور (خصوصی رپورٹر) وزیراعلیٰ عثمان بزدار نے حضوری باغ میں پنجاب میں کلین اینڈ گرین پاکستان مہم کاافتتاح کیا۔ وزیراعلیٰ نے حضوری باغ میں پہلے پودا لگایا، جھاڑو دیا اور صابن سے ہاتھ صاف کئے۔ وزیراعلیٰ کے بعدچیف سیکرٹری پنجاب،سابق کرکٹر انضمام الحق اور سکول کے ایک بچے نے بھی حضوری باغ میں پودے لگائے۔ صاف و سبز پاکستان مہم کی کامیابی کیلئے دعا بھی کی گئی۔وزیراعلیٰ حضوری باغ میں موجود سکاؤٹس کے پاس گئے اوران سے ہاتھ ملایا اورانہیں اس قومی مہم کو کامیاب بنانے کی تلقین کی ۔وزیراعلیٰ نے میڈیا سے گفتگو میں کہا کہ کلین اینڈ گرین پاکستان مہم قومی تحریک ہے جسے ہم نے ملکر کامیاب کرنا ہے ۔پنجاب میں اس مہم کو ہر قیمت پر کامیاب کیا جائے گا اوراس میں ہر محکمہ پوری طرح حصہ لے گااور کلین اینڈ گرین پاکستان ہی ہماری منزل ہے۔ نبی پاکؐ کا ارشاد مبارک ہے کہ صفائی نصف ایمان ہے۔ حفظان صحت کے مطابق زندگیاں بسر نہ کرنے پر ہر سال 40ہزار بچے موت کے منہ میں چلے جاتے ہیں۔ پنجاب میں 50کروڑ پودے لگانے کا ہدف پورا کریںگے اور اس ضمن میں مقابلے بھی کرائے جائیںگے اوراچھی کارکردگی پر تحصیل کی سطح پر انعامات دیئے جائیںگے۔ وزیراعلیٰ نے کہا کہ قبضہ مافیا اورتجاوزات کیخلاف آپریشن میںابھی تک 55ارب روپے کی سرکاری اراضی کو واگزار کرایا جاچکا ہے اوریہ آپریشن بلا امتیاز جاری رہے گا۔ واگزار کرائی گئی زمین کو استعمال میں لانے کیلئے لینڈ بینک بنے گا جس کیلئے ہدایات جاری کردی گئی ہیں۔ہم اس زمین کا بہترین استعمال کریںگے اوریہاں پر پودے بھی لگائیں گے۔ انسپکٹر جنرل پولیس کی تقرری بھی ضمنی الیکشن کا شیڈول آنے کے بعد ہوئی تھی اورتبادلہ بھی اسی طرح ہوا۔ضمنی الیکشن کے پرامن انعقاد کیلئے امن و امان کا قیام یقینی بنانا ہماری ذمہ داری ہے ا وراس مقصد کیلئے دفعہ144نافذ ہے ۔کسی کو قانون ہاتھ میں لینے کی اجازت نہیں دی جاسکتی۔ سانحہ ماڈل ٹاؤن کے حوالے سے عدلیہ کی جانب سے کوئی ہدایات موصول نہیں ہوئی ،جو عدلیہ حکم دے گی اس پر عملدر آمد کیا جائے گا۔ ڈویلپمنٹ اتھارٹیز کے بورڈ مکمل نہیں جس کی وجہ سے کچھ کام رکے ہوئے ہیں لیکن میں نے بورڈز کو جلد مکمل کرنے کے لئے ہدایات جاری کردی ہیں۔ میں آئینی وزیراعلیٰ ہوں اورآئین کے تحت ہی اپنے تمام اختیارات استعمال کررہا ہوں کیونکہ آئین میں ہرکسی کا رول متعین ہے۔ پنجاب میں کوئی کسی کے اختیارات استعمال نہیں کررہا۔ مجھے کام لینے کے سارے طریقے آتے ہیں لیکن میں پیار محبت سے کام کرتا ہوں اورلیتا ہوں ۔ اجلاس سے خطاب میں وزیراعلیٰ ہائیکورٹ بار ایسوسی ایشن ملتان کے صدر خالد اشرف خان کی قیادت میں وکلاء کے وفد نے ملاقات کی۔ وزیراعلیٰ نے کہا کہ قانون اور انصاف کی عملداری یقینی بنانے کیلئے وکلاء برادری کا کلیدی کردار ہے اورعام آدمی کو انصاف دلانے کیلئے وکلاء برادری کو اپنا بھرپور کردار ادا کرنا ہوگا کیونکہ بروقت انصاف سے ہی معاشرے پنپتے ہیں اور جہاں انصاف نہ ہو وہ معاشرے پیچھے رہ جاتے ہیں۔ پارلیمانی سیکرٹری جویریہ آہیر سے گفتگو میں عثمان بزدار نے کہا ہے کہ تحریک انصاف کی حکومت نے مسائل کے حل کیلئے تیز رفتاری سے اقدامات کئے ہیں - قوم کو عمران خان کی صورت میں ایماندار قیادت ملی ہے اور عمران خان پاکستان کو خوشحال، ترقی یافتہ اور پرامن بنائیں گے۔ عثمان بزدارنے کہا ہے کہ غریب عوام کی خوشحالی کے مشن کو پورا کریںگے۔ چھوٹے کاشتکاروںکیلئے سود سے پاک قرضوں کا پروگرام لائیںگے۔جنوبی پنجاب کے کاشتکاروں کو ترجیحی بنیادوں پر بلاسود قرضے دیئے جائیںگے۔ چھوٹے گھروں کی تعمیرکیلئے بلاسودقرضوں کا پراجیکٹ شروع کرنے پر غور کررہے ہیں۔پاکستان کے ہر شہری کو غربت سے نکالنا تحریک انصاف کی حکومت کا عزم ہے۔
عثمان بزدار/ صفائی مہم
