محراب پور (نامہ نگار)  آٹے، چینی اور یوریا کھاد کی ذخیرہ اندوزی کرنے والوں کیخلاف سخت کاروائی کی جائیگی،ضلع کی حدود میں چیک پوسٹیں قائم کرکے محکمہ خوراک، محکمہ زراعت، بیورو آف سپلائی اور روینیو افسران کی ڈیوٹیاں لگائی گئی ہیں، گندم کی خریداری کا ہدف حاصل کرنے، آٹے، چینی اور یوریا کی ذخیرہ اندوزی روکنے کیلئے منعقدہ اجلاس سے خطاب کرتے ہوئے ڈپٹی کمشنر نوشہروفیروز محمد تاشفین عالم نے مزید کہا ہے کہ ضلعی فوڈ کنٹرولر ضلع نوشہرو فیروز میں گندم خریداری کا ہدف پورا کرنے کیلئے ضلع میں ذخیرہ اندوزی کرنے والے تاجروں سے گندم حاصل کی جائے تعاون نہ کرنے والے ذخیرہ اندوزون کیخلاف قانونی کارروائی کریں اور ذخیرہ اندوزی کرنے والے تاجروں کے گودام سیل کردیں،کسی بھی ذخیرہ اندوز سے کسی قسم کی کوئی رعایت نہ کی جائے ضلع کے داخلی و خارجی راستوں پر پولیس اور اور محکمہ خوراک کا عملہ مل کرچوکیاں قائم کریں،اس موقع پر ایڈیشنل ڈائریکٹر زراعت نے اجلاس کو بتایا کہ گندم کی کمی کی وجہ سے آٹے کی قیمت بڑھ رہی ہے جبکہ یوریا کھاد پنجاب اور افغانستان اسمگلنگ ہونے کے باعث ضلع میں قلت پیدا ہورہی ہے جس کو روکنے کیلئے اقدامات کیئے جا رہے ہیں، انہوں نے کہا کہ کھاد کے تمام ڈیلروں کو پابند کیا گیا ہے کہ وہ یوریا کھاد کی خریداری کی رسیدیں فراہم کریں اور ضلع میں آبادگاروں کو یوریا کی فراہمی کا ریکارڈ بھی فراہم کریں، اس موقع پر ایڈیشنل ڈپٹی کمشنر مہدی مالوف، ضلعی فوڈ کنٹرولر حسن علی مگسی،ایڈیشل ڈائریکٹر ایگریکلچر ایکسٹینشن غلام فاروق وسطڑو اور دیگر اداروں کے افسران موجود تھے۔

عمران خان کی جان کو خطرے کے پیش نظر پولیس کا بنی گالہ میں سرچ آپریشن