کراچی ( نیوز رپورٹر) پاکستان پیپلزپارٹی کے چیئرمین بلاول بھٹوکے استقبال کے ضلع وسطی میں تیاریاں عروج پر پہنچ گئیں،سابق صدر ضلع وسطی سید سہیل عابدی ،حمید میمن، سلیم لالاکی قیادت میں سینکڑوں گاڑیوں کا قافلہ کراچی ایئرپورٹ پہنچے گااور بعدازاں جلسے میں شرکت کرے گا۔پاکستان پیپلزپارٹی کے سینئر رہنماسید سہیل عابدی کا کہناہے کہ پارٹی چیئرمین بلاول بھٹوکاشاندار استقبال کرکے نئی تاریخ رقم کریں گے۔انہوں نے کہاکہ تاریخ ایک نئے دورسے گزررہی ہے،جیالے اپنی طاقت کا بھرپورمظاہرہ کرکے دنیاکو بتادیں گے کہ کراچی بلاول بھٹوکے چاہنے والوں کا شہر ہے۔انہوں نے کہاکہ پاکستان پیپلزپارٹی ملک گیر طاقت رکھنے والی پارٹی ہے، الزام تراشی کرکے پوائنٹ اسکورنگ کرنے والے جلد منہ کی کھائیں گے۔سید سہیل عابدی نے کہاکہ پچھلی حکومت کا گند صاف کرنے میں وقت لگے گا،وفاقی حکومت بگڑے معاملات کو سدھارنے کے لئے کاوشیں بروئے کارلارہی ہے۔پاکستان کو حقیقی معنوں میں جمہوریت کی پٹری پر لائیں گے۔عمرانی ٹولہ اقتدار ہاتھ سے جانے پر بلبلارہاہے۔انہوں نے کہاکہ قوم کو بے وقوف بنانے کا وقت جاچکااب کوئی نام نہادتبدیلی کے نام پر بے وقوف نہیں بنے گا۔تبدیلی کے نام پر عمران خان نے پاکستان کی تنزلی کردی ،ملک کئی سال پیچھے چلاگیاہے ،دوبارہ ترقی کی ڈگر پر لانے میں وقت درکار ہے ،جس تیزی کے ساتھ موجودہ حکومت بحرانات کے خاتمے اور معیشت کی بحالی میں کرداراداکررہی ہے اس کی مثال نہیں ملتی۔انہوں نے کہاکہ پاکستان پیپلزپارٹی ہمیشہ عوام کی آوازبنتی ہے،یہی وجہ ہے کہ عوام نے پیپلزپارٹی پر ہمیشہ اعتماد کیاہے۔کراچی کے شہری اتوار کو بلاول بھٹو کے استقبال اور جلسے کو بھرپور کامیاب بنائیں گے۔

عمران خان کی جان کو خطرے کے پیش نظر پولیس کا بنی گالہ میں سرچ آپریشن