۔فلاحی ادارے آغوش آرفن کئیر ہوم میں یتیم بچوں کیلئے تقریب

لاہور (خصوصی نامہ نگار)منہاج القرآن انٹرنیشنل کے فلاحی ادارے آغوش آرفن کئیر ہوم میں زیر تعلیم یتیم بچوں کیلئے تقریب کا انعقاد کیا گیا۔ ناظم اعلیٰ منہاج القرآن انٹرنیشنل خرم نواز گنڈا پور نے پبلک ریلیشنر ڈیپارٹمنٹ کی طرف سے بچوں میں تحائف تقسیم کئے۔ بچوں میں تحائف تقسیم کرنے کی اس تقریب میں ڈائریکٹر آغوش کمپلیکس کرنل ( ر) مبشر اقبال ، نائب ناظم اعلیٰ میڈیا افیئرز نور اللہ صدیقی، ڈائریکٹر پبلک ریلیشنز شہزاد رسول ، ڈپٹی ڈائریکٹر حاجی محمد اسحاق ،آغوش آرفن کیئر ہوم کا عملہ اور بچوں کی نگہداشت کرنے والی ’’مدرز‘‘ موجود تھیں۔ ناظم اعلیٰ خرم نواز گنڈاپور اور دیگر رہنماؤںنے کچھ وقت یتیم بچوں کے ساتھ گزارا اور ان سے گفتگو کی۔تقریب سے خطاب کرتے ہوئے خرم نوا زگنڈا پور نے کہا کہ اسلام نے یتیموں کے ساتھ حسن سلوک کا حکم دیا ہے۔ دین اسلام یتیموں کے ساتھ اچھے برتاؤ اور ان کی کفالت کا درس دیتا ہے۔ ڈائریکٹر آغوش کمپلیس کرنل ( ر ) مبشر اقبال نے کہا کہ 2005ء سے تاحال ہزار ہا یتیم بچے یہاں سے تعلیم مکمل کر کے مختلف شعبہ جات میں بطور پروفیشنل اپنی خدمات انجام دے رہے ہیں۔ یتیم بچوں کو بہترین رہائش، تعلیم اور غیر نصابی سرگرمیوں میں حصہ لینے کی سہولیات میسر ہیں۔ آغوش آرفن کیئر ہوم میں بلوچستان، سندھ، گلگت  بلتستان، کشمیر سے بھی یتیم بچے زیر تعلیم اورزیر کفالت ہیں۔