بھارت میں نفرت آمیز تقاریر میں اضافہ ہوا ہے:دفتر خارجہ
اسلام آباد: دفتر خارجہ نے کہا ہے کہ ہیومن رائٹس واچ کی رپورٹ کے مطابق بھارت میں نفرت آمیز تقاریر میں اضافہ ہوا ہے۔ بھارتی میڈیا نے بھی ہیش ٹیگ کورونا جہاد کے الفاظ استعمال کیے۔
صحافیوں کو ہفتہ وار بریفنگ دیتے ہوئے ترجمان دفترخارجہ عائشہ فاروقی نے کہا کہ مقبوضہ کشمیر میں ماہ مقدس رمضان میں بھی بھارتی قابض فوج کے مظالم جاری ہیں۔ صحافیوں کو ان مظالم کی کوریج سے روکنے کیلئے دبایا جارہا ہے۔ اس وقت جب دنیا کورونا وائرس سے نبردآزما ہے۔ بھارت کی جانب سے مقبوضہ کشمیر میں انسانی حقوق کی خلاف ورزیاں افسوسناک ہیں۔
عائشہ فاروقی نے اسرائیلی حکومت کی جانب سے فلسطینی علاقوں کو ضم کرنے کی مذمت کرتے اس اقدام کو عالمی قانون کی خلاف ورزی قرار دیا۔
ترجمان دفترخارجہ نے مزید کہا کہ پاکستان 1967ء کے سرحدی نقشے پر مشتمل آزاد فلسطین کا حامی ہے۔ جموں و کشمیر اور فلسطین اقوام متحدہ کے ایجنڈے پر دیرینہ مسائل ہیں جہاں آبادی کا تناسب تبدیل کرنے کی کوشش کی جا رہی ہے۔
