وزیراعظم عمران خان نے کہا ہے کہ موجودہ حکومت ملکی تاریخ کی پہلی حکومت ہے جو جو ملک کی حالت زار بدلنے کے لیے اپنے منشور کے مطا بق ڈھانچہ جاتی اصلاحات پر عمل پیرا ہے۔ قوموں کی زندگی میں مشکل مرحلے کے بعد اچھا اور خوشحال دور شروع ہوتا ہے۔ کاوشوں کا مقصد ذاتی مفادات کا حصول نہیں بلکہ عوام کی بہتری ہے۔ اس امر کا اظہار انہوں نے وزارت اطلاعات کے مختلف محکموں کے سربراہان سے بات چیت کرتے ہوئے کیا جنہوں نے پیر کو وزیراعظم سے ملاقات کی۔ ملاقات میں وزیر اطلاعات چوہدری فواد حسین ،معاونیں خصوصی افتخار درانی، یوسف بیگ مرزا موجود تھے۔ وزیراعظم نے ہدایت کی کہ وزارت اطلاعات اصلاحاتی ایجنڈے اور مقاصد اجاگر کرنے میں کردار ادا کرے۔ ذمہ دار میڈیا ملک کی تعمیر و ترقی اور عوام کو باخبر رکھنے میں کلیدی کردار ادا کرتا ہے۔ وزارت اطلاعات حکومتی پالیسیوں سے متعلق عوام کو باخبر رکھنے کے لئے مزید متحرک کردار ادا کرے۔ میڈیا سے متعلق حکومتی پالیسیوں کے بارے میں من گھڑت پراپیگنڈہ محرکات سے بخوبی آگاہ ہیں۔ میڈیا کے ساتھ مل کر مذموم ایجنڈے کو بے نقاب کرنے کی ضرورت ہے۔ کوئی مہذب اور ذمہ دار معاشرہ بے بنیاد اور من گھڑت خبروں کی تشہیر کی اجازت نہیں دیتا۔ بے بنیاد خبروں کی اشاعت کی روش کی حوصلہ شکنی کے لئے میڈیا کے ساتھ روابط کو مزید مضبوط کیا جائے۔ وزارتوں کے تعلقات عامہ کے افسران میڈیا کی معلومات تک کی رسائی اور درست انفارمیشن کی فراہمی میں متحرک کردار ادا کریں ، ملاقات میں سیکرٹری اطلاعات شفقت جلیل چیئرمین پیمرا سلیم بیگ بھی شریک تھے۔