جو ظلم تو سہتا ہے پر بغاوت نہیں کرتا
مکرمی! کرغزستان میں مہنگائی اور لوڈشیڈنگ کے ستائے ہوئے عوام نے ایوان صدر اور ایوان بالا پر قبضہ کرکے صدر مملکت کو ملک چھوڑنے پر مجبور کر دیا۔ خونریز ہنگاموں میں سینکڑوں افراد لقمہ اجل بن گئے اور ہزاروں کی تعداد میں زخمی ہوئے ہلاک ہونے والوں میں وزیر داخلہ بھی شامل ہیں۔ وزیراعظم نے استعفیٰ دے دیا۔ مہنگائی اور لوڈشیڈنگ نے کرغزستان کے عوام کو اتنا کچھ کرنے پر مجبور کر دیا تھا یہی کچھ پاکستان میں ہو رہا ہے۔ پاکستان میں مہنگائی‘ غربت‘ بے روزگاری‘ قانونیت‘ لوڈشیڈنگ‘ آٹا چینی اور پانی کی عدم دستیابی نے لوگوں کا جینا حرام کر دیا ہے۔ آئے دن قیمتوں میں اضافہ اور اضافے کا کہیں بھی ٹھہراو نہیں۔ عوام مہنگائی کی چکی کے دو پاٹوں میں پس کر رہ گئے ہیں۔ لوگ بھوک اور افلاس کی وجہ سے اپنے بچے تک فروخت کرنے پر تلے ہوئے ہیں مگر حکمران ہیں کہ انکے کانوں پر جوں تک نہیں رینگتی۔
8 اپریل 2010ءکے ”نوائے وقت“ اور دیگر اخبارات میں گورنر بلوچستان کا بیان حکمرانوں کی آنکھیں کھولنے کیلئے کافی ہے۔ ”عوام کے مسائل حل کرنے کیلئے ہم جیسے جاگیرداروں کو پھانسی لگانا پڑیگا“ شاید حکمران یہ بیان پڑھ کر ہوش کے ناخن لے لیں اور عوام کے دکھوں کا مداوا کر دیں کہیں ایسا نہ ہو کہ کرغزستان کے عوام کی طرح پاکستان کے لوگ بھی اپنے حقوق کیلئے آگ اور خون کے دریا نہ عبور کرنے پر مجبور ہو جائیں۔ قتیل شفائی مرحوم نے کہا تھا کہ
اس شخص سے بڑا منافق کوئی ہو نہیں سکتا قتیل جو ظلم تو سہتا ہے پر بغاوت نہیں کرتا
راو محمد محفوظ آسی ٹاون شپ لاہور
