ترک جنگجو کر دستان ورکرز پارٹی نے سر نڈر کردیا پ‘ تنظیمی ڈھانچہ تحلیل

انقرہ (نوائے وقت رپورٹ) کردستان ورکرز پارٹی (پی کے کے) نے ترک ریاست کے خلاف 4 دہائیوں سے زیادہ عرصے سے جاری مسلح جدوجہد کے خاتمے کا اعلان کرتے ہوئے خود کو تحلیل کردیا۔غیر ملکی خبر رساں ادارے کی رپورٹ کے مطابق پی کے کے کی "12ویں کانگریس نے پارٹی کے تنظیمی ڈھانچے کو تحلیل کرنے اور اس کے مسلح جدوجہد کے طریقہ کار کو ختم کرنے کا فیصلہ کیا۔ رپورٹ کے مطابق یہ اعلان پارٹی کی جانب سے گزشتہ ہفتے اپنی کانگریس کے انعقاد کے بعد جاری کردہ بیان میں کیا گیا۔پی کے کے کی جانب سے اپنی تحلیل کرنے کا اعلان تنظیم کے بانی عبداللہ اوکلان جو 1999ء سے استنبول کے ایک جزیرے پر جیل میں بند ہیں‘کے اس بیان پر عمل نظر آیا جس میں انہوں نے فروری میں اپنے جنگجوؤں کو غیر مسلح ہونے پر زور دیا۔پی کے کے کی قیادت نے کچھ دن بعد اوکلان کی بات کو قبول کرتے ہوئے جنگ بندی کا اعلان کیا۔ہفتے کے روز ایک تقریر میں صدر رجب طیب اردگان نے اشارہ دیا تھا کہ کسی بھی وقت پی کے کے تحلیل ہونے کی خبر آ سکتی ہے، انہوں نے مزید کہا کہ ان کی حکومت ملک کو دہشت گردی کی لعنت سے بچانے کے لیے پرعزم ہے۔