پاکستان کی علی سسٹرز نے ایک بار پھر ملک کا نام بلند کردیا

لاہور(سپورٹس رپورٹر) پاکستان کی علی سسٹرز نے ایک بار پھر ملک کا نام بلند کردیا۔پشاور سے تعلق رکھنے والی سحرش علی نے اپنی بہن ماہ نور علی کو شکست دے کر یو ایس اے جونیئر ویمن گولڈ سکواش چیمپین شپ  جیت لی۔ سحرش علی نے گولڈ اور ماہ نور علی نے سلور میڈل حاصل کر لیا۔ نیویارک میں چیمپین شپ کے گرلز انڈر15ایونٹ کا فائنل علی سسٹرز کے درمیان کھیلا گیا۔ ٹائٹل کیلئے ہونیوالے مقابلے میں حیران کن طور پر سحرش علی نے ٹاپ سیڈ ماہ نور علی کو 0-3 سے زیر کرکے فتح حاصل کرلی۔ قبل ازیں سیمی فائنل میں ماہ نور علی نے امریکہ کی ہیلسز سوئیٹ ایم  کو بآسانی 0-3 سے مات دی جبکہ سحرش علی نے جولی یی کو 1-3 سے قابو کیا۔ یہ امر قابل ذکر ہے کہ انٹرنیشنل ویمن سکواش میں فتوحات کے جھنڈے گاڑنے والی علی سسٹرز نے حال ہی میں میلبورن میں ہونیوالی آسٹریلین جونیئر ویمن سکواش چیمپین شپ میں پاکستان کیلئے عظیم کارنامے انجام دئیے تھے۔ ماہ نور علی نے جونیئر انڈر 13 ایونٹ جیت کر گولڈ میڈل اپنے نام کیا تھا جبکہ سحرش علی نے انڈر 15 کا فائنل کھیل کر سلور میڈل پایا تھا۔