اسلام آباد(سٹاف رپورٹر) پاکستان اور ترکمانستان کے درمیان وزرائے خارجہ کی سطح پر مذاکرات گزشتہ روز دفتر خارجہ میں منعقد ہوئے۔ وزیر خارجہ شاہ محمود قریشی اور ترکمانستان کیوزیرخارجہ راشد میریدوف نے اپنے وفود کی قیادت کی۔ دفتر خارجہ کے بیان میں بتایا گیا ہے کہ ترکمانستان کے وزیر خارجہ کے اس دورے سے دونوں ملکوں کے درمیان مضبوط اقتصادی شراکت داری استوار کرنے میں مدد ملے گی۔اجلاس میں پاکستان اور ترکمانستان کے مابین پہلے سیاسی مشاورتی اجلاس میں کئے گئے دو طرفہ فیصلوں پر عملدرآمد کا جائزہ لیا گیا ۔دوران مذاکرات فریقین نے پاکستان اور ترکمانستان کے مابین سیاسی، سفارتی، اقتصادی، تجارتی اور دفاعی شعبوں میں ہونے والی پیشرفت کو سراہا۔طرفین نے پاکستان اور ترکمانستان کے مابین باہمی تعاون کے دیگر پہلوؤں پر غور و خوض پر اتفاق کیا جب کہ اجلاس کے بعد پاکستان اور ترکمانستان کے مابین دو طرفہ تعاون میں فروغ کیلئے مفاہمتی یادداشتوں پر دستخط کئے گئے۔