آرمی چیف کو بانی پی ٹی آئی کا تیسرا خط، آئی ایم ایف کو ڈوزیئر بھیج دیا

اسلام آباد (اپنے سٹاف رپورٹر سے ) بانی پی ٹی آئی کی جانب سے آج تیسرا کھلا خط آرمی چیف جنرل عاصم منیر کو بھجوانے کا فیصلہ کیا گیا ہے جس میں انہوں نے عام انتخابات 2024ء میں مبینہ دھاندلی کا معاملہ بھی اٹھایا ہے۔ عمران خان کے وکیل فیصل چوہدری نے اڈیالہ جیل کے باہر دیگر وکلاء کے ہمراہ میڈیا سے گفتگو کرتے ہوئے کہا کہ بانی پی ٹی ائی نے خط کے مندرجات پارٹی رہنماؤں کو نوٹ کروا دیے، بانی پی ٹی آئی کا خط 6 پوائنٹس پر مشتمل ہوگا۔ بانی پی ٹی آئی نے تیسرے خط کے حوالے سے تمام پوائنٹس نوٹ کروا کے ہدایات دے دی ہیں۔ خط میں ڈیپ سٹرکچرل ریفارمز، حکومت کی پالیسیوں سے جمہوریت کو پہنچنے والے مبینہ نقصان سمیت دیگر پوائنٹس شامل ہوں گے۔ ان کا کہنا تھا کہ 9  مئی کے واقعہ پر ہم آج بھی جوڈیشل کمشن کے قیام کے مطالبے پر قائم ہیں۔ آٹھ فروری کے بعد پنجاب میں چھاپوں کا سلسلہ تاحال جاری ہے۔ وزیر آباد میں پولیس نے ہمارے ایک کارکن کا جنازہ نہیں پڑھنے دیا۔ بانی پی ٹی آئی سمیت آج پارٹی کے دیگر لیڈرز جی ایچ کیو کیس میں پیش ہوئے ہیں۔ عامر ڈوگر کو اپوزیشن کے ساتھ مذاکراتی کمیٹی کا ممبر بنایا گیا ہے۔ سیاسی کمیٹی میں کچھ نئے ممبران کے اضافہ کا فیصلہ کیا گیا ہے۔ انتظار پنجوتھہ کو آج جیل میں نہیں جانے دیا گیا۔ وکلاء کو جیل ٹرائل میں نہیں جانے دیا جا رہا۔ صحافیوں میں بھی پک اینڈ چوز کیا جاتا ہے۔ ہم جی ایچ کیو کیس میں بھی اوپن ٹرائل کی درخواست دائر کریں گے۔ 26 ویں ترمیم کے بعد نظام عدل زمین بوس ہوگیا ہے۔ فیصل چوہدری نے کہا کہ خط میں الیکشن فراڈ کے ذریعے اقلیت کو اکثریت پر ترجیح دینے کا معاملہ اٹھایا گیا ہے۔ بانی پی ٹی آئی نے خط میں کہا ہے منی لانڈرز کو اقتدار میں بٹھایا گیا ہے۔ بانی پی ٹی آئی کے تیسرے خط کے مندرجات آج سامنے آئیں گے۔ فیصل چودھری نے کہا کہ بانی نے کہا ہے دہشت گردی رول آف لاء نہ ہونے کی وجہ سے بڑھ رہی ہے۔ بانی نے کہا ہے 18 لاکھ لوگ ملک چھوڑ گئے ہیں۔ بانی نے کہا ہے 20 ارب ڈالر کا سرمایہ ملک سے باہر چلا گیا ہے۔ بانی نے کہا ہم نے جب حکومت چھوڑی معیشت کی گروتھ 6 اعشاریہ 4 فیصد تھی۔ بانی نے کہا ہے کورٹ پیکنگ پی ٹی آئی کے خلاف کریک ڈاؤن کیلئے کی جارہی ہے۔ فیصل چوہدری نے کہا کہ بانی نے کہا ہے قانون ورلڈ پروجیکٹ انڈیکس پر پاکستان 140 ویں نمبر ہے۔ شیر افضل مروت کے حوالے سے پارٹی اپنا موقف دے دے گی۔ ہم شیر افضل مروت کے بارے میں فیصلے کی تردید یا تصدیق نہیں کریں گے۔ شیر افضل مروت کا معاملہ پارٹی کا انٹرنل معاملہ ہے۔ پارٹی اس پر اپنا موقف دے دے گی۔نوائے وقت رپورٹ کے مطابق قومی اسمبلی میں اپوزیشن لیڈر اور پی ٹی آئی رہنما عمر ایوب نے خط میں کہا ہے کہ اسلام آباد میں آئی ایم ایف مشن کو ڈوزیئر اور خط بھیج دیا ہے۔ ڈوزیئر چیف جسٹس آف پاکستان کو بھی بھجوایا گیا ہے۔ ڈوزیئر میں عام انتخابات میں دھاندلی سے متعلق شواہد موجود ہیں۔ بانی پی ٹی آئی نے سات جولائی 2023ء کو آئی ایم ایف وفد سے ملاقات کی تھی۔ ملاقات میں بانی پی ٹی آئی نے قانون کی بالادستی کیلئے شفاف انتخابات کے انعقاد پر زور دیا تھا۔ ڈوزیئر میں شواہد ہیں کہ کس طرح پی ٹی آئی کو دبایا جا رہا ہے۔ ڈوزیئر میں حقائق اور شواہد موجود ہیں کہ کس طرح پی ٹی آئی سے مینڈیٹ چھینا گیا۔ سیاسی اور معاشی استحکام کیلئے ضروری ہے کہ ہمارے تحفظات پر توجہ دلائی جائے۔