وزیر اعظم عمران خان ضلع خیبر پہنچ گئے
وزیر اعظم عمران خان ضلع خیبر پہنچ گئے ۔
وزیر اعظم عمران خان نے احساس نشوونماپروگرام کاباقاعدہ اجرا کردیا، پروگرام کے تحت بچیوں کیلئے 2ہزار روپے سہ ماہی وظیفہ اور بچوں کیلئے 1500روپے ہوگا۔
تفصیلات کے مطابق وزیر اعظم عمران خان ضلع خیبر پہنچے اور شجرکاری مہم کےتحت خیبر میں پودا لگایا جبکہ پولیو سے بچاؤ کےقطرے بھی پلائے ، اس موقع پر یوم آزادی کی مناسبت سے وزیراعظم نے قومی پرچم والا ماسک پہن رکھا تھا۔
جس کے بعد وزیر اعظم عمران خان نے احساس نشوونما پروگرام کا باقاعدہ اجرا کیا، وزیراعلیٰ کے پی محمودخان بھی عمران خان کے ہمراہ تھے، اس موقع پر وزیراعظم کو معاون خصوصی ثانیہ نشتر نے احساس نشوونما پروگرام پر بریفنگ دی۔
بریفنگ میں بتایا گیا کہ تین سالہ نشوونما پروگرام کا بجٹ 8.52 بلین روپے رکھاگیا ہے، پہلے مرحلے میں 9اضلاع میں 33 نشوونما مراکز قائم کئے جارہے ہیں، اس پروگرام میں عالمی ادارہ خوراک کا تعاون شامل ہے۔
معاون خصوصی ثانیہ نشتر نے کہا پروگرام کے تحت بچیوں کیلئے 2ہزار روپے سہ ماہی وظیفہ اور بچوں کیلئے1500روپے ہوگا، پنجاب میں ضلع راجن پور میں 4 نشوونما مراکز قائم ، خیبر پختونخوا، ضلع اپر دیر میں 6، خیبر میں 3 نشوونما مراکز قائم کیے جا چکے ہیں۔
ثانیہ نشتر کا کہنا تھا کہ سندھ میں ضلع بدین میں 6 نشوونما مراکز قائم کیے جائیں گے جبکہ بلوچستان میں ضلع خاران میں 3نشوونما مرکز قائم کیے جا رہے ہیں اور آزاد کشمیر میں ضلع باغ میں 3 اور گلگت بلتستان میں 8 نشوونما مراکز قائم کیے جائیں گے۔
