عمران کی پالیسیوں کا مقصد معیشت میں نئی جان ڈالنا، ترجیحات گلوبل ایجنڈا کے مطابق ہیں: ملیحہ لودھی
نیویارک(آن لائن)اقوام متحدہ میں پاکستان کی مستقل مندوب ملیحہ لودھی نے کہا ہے کہ عمران خان کی حکومت کی سماجی و معاشی ترجیحات گلوبل ایجنڈا 2030 کے مطابق ہیں۔اقوام متحدہ کی جنرل اسمبلی کی کمیٹی سے خطاب میں ملیحہ لودھی نے کہا کہ وزیراعظم کی پالیسیوں کا مقصد معیشت میں نئی جان ڈالنا ہے۔حکومتی سٹرکچرمیں بہتری، احتساب، شجرکاری، صحت اور تعلیم میں اصلاحات، زراعت کا فروغ، سستی توانائی اور پانی ذخیرہ کرنا نئی حکومت کی ترجیحات میں شامل ہے۔پاکستانی مندوب نے پانی کے وسائل کے حوالے سے اٹھائے گئے حکومتی اقدامات پر روشنی ڈالتے ہوئے کہاپاکستان اپنی پانی کی ضروریات اور مسائل سے واقف ہے،ہم نے حال ہی میں ایک نیشنل واٹر پالیسی تشکیل دی ہے،جس کے ذریعے پانی کو محفوظ کرنے کے لیے وسیع پیمانے پر منصوبوں کے حوالے سے کام جاری ہے۔ قدرتی وسائل کی تلاش اور خود انحصاری حکومتی اقدامات کا بنیادی جزو ہے جبکہ احتساب اور لوٹی ہوئی دولت کی واپسی بھی نئی پاکستانی حکومت کے ایجنڈے میں شامل ہے۔ان کا کہنا تھا ہم اس بات پر پختہ یقین رکھتے ہیںرقوم کے غیر قانونی بہاؤ اور لوٹی ہوئی دولت کی واپسی کے لیے عالمی تعاون کو مزید بڑھانے کی اشد ضرورت ہے۔ گلوبل ایجنڈا 2030 میں نو آبادیاتی اور محکوم ممالک کے عوام کے حقوق کا خیال رکھنا ہوگا۔
ملیحہ لودھی