قومی ہاکی کو اسپانسر مل گیا، ہائیر پاکستان سے معاہدہ
لاہور (اسپورٹس ڈیسک )پاکستان کے قومی کھیل ہاکی کو اپنے ماضی کے عروج پر دوبارہ لانے کے لیے پشاور زلمی کے مالک جاوید آفریدی کرکٹ کے بعد ہاکی میں خدمات کے لیے سرگرم ہوگئے۔پاکستان کے قومی کھیل کو ترقی دلانے کے لیے جاوید آفریدی میدان میں آگئے، اور ان کی کمپنی ہائیر پاکستان آئندہ 2 برس کے لیے قومی ٹیم کی اسپانسر بن گئی۔پاکستان ہاکی فیڈریشن (پی ایچ ایف) کے عہدیداران اور پشاور زلمی کے چیئرمین جاوید آفریدی کے درمیان اہم ملاقات میں ٹائٹل اسپانسر شپ کا اہم معاملہ طے پاگیا۔لاہور میں مفاہمت کی یادشت سے متعلق ہونے والی اس تقریب میں جاوید آفریدی نے کہا کہ قومی کھیل دنیا بھر میں پاکستان کی پہچان رہا ہے۔انہوں نے کہا کہ پاکستان ہاکی ٹیم نے ماضی میں چار مرتبہ عالمی کپ، تین مرتبہ چیمپیئنز ٹرافی اور تین مرتبہ اولمپکس میں گولڈ میڈل جیت کر پاکستان کا سبز ہلالی پرچم بلند کیا۔جاوید آفریدی نے مزید کہا کہ پاکستان میں کرکٹ کی طرح ہاکی کے کھیل میں بھی باصلاحیت کھلاڑی موجود ہیں جو قومی ٹیم کو اس کی کھوئی ہوئی ساکھ واپس دلواسکتے ہیں۔پشاور زلمی کے چیئرمین نے باور کروایا کہ ان کی کمپنی ہی 2020 تک ہاکی ٹیم اور پی ایچ ایف کی اسپانسر ہوگی۔انہوں نے یقین دلایا کہ ان کی کمپنی بین الاقوامی مقابلوں کے ساتھ ساتھ مقامی ایونٹس کے انعقاد کے لیے بھی پی ایچ ایف کا بھرپور ساتھ دے گا۔اس موقع پاکستان ہاکی فیڈریشن کے صدر خالد سجاد کھوکھر اور سیکریٹری شہباز سینئر نے اپنے خیالات کا اظہار کرتے ہوئے کہا کہ جاوید آفریدی نے ایسے وقت میں پاکستان ہاکی کی مدد کی جب اسے اس کی اشد ضرورت تھی۔خیال رہے کہ ہاکی کا عالمی میلا رواں ماہ 28 نومبر سے بھارت کے شہر بھوبنیشور میں شروع ہوگا۔