اسلام آباد ہائیکورٹ کا منشیات کی روک تھام کیلئے تعلیمی اداروں میں براہ راست ڈلیوری پر پابندی کا حکم

اسلام آباد ہائیکورٹ نے منشیات کی بڑھتی ہوئی شکایات کے پیش نظر تعلیمی اداروں میں طلبہ کو اشیاء کی براہ راست ڈلیوری پر پابندی کا حکم دے دیا ہے یہ حکم تعلیمی نصاب میں منشیات سے متعلق آگاہی شامل کرنے کی درخواست پر سماعت کے دوران دیا گیا جسٹس انعام امین منہاس نے ریمارکس دیے کہ منشیات زیادہ تر کوریئر اور ڈلیوری سروسز کے ذریعے اسکولوں اور کالجوں تک پہنچتی ہیں اور کئی بار طلبہ کھانے پینے کی چیزوں کے ساتھ منشیات بھی منگوا لیتے ہیں اس صورتحال کو روکنے کے لیے براہ راست ڈلیوری کا نظام بند کرنا ہوگا عدالت نے ہدایت دی کہ جو تعلیمی ادارے اس فیصلے پر عمل درآمد نہیں کرتے ان کے خلاف فوری کارروائی کی جائے اور تعلیمی اداروں میں کی جانے والی تمام ڈلیوریز کی جانچ پڑتال کی جائے عدالت نے یہ بھی استفسار کیا کہ نیشنل اینٹی نارکوٹکس کونسل قائم کی گئی یا نہیں کیونکہ یہ ایک اہم ادارہ ہے جس کی سربراہی وزیراعظم کرتے ہیں اور چاروں صوبوں کے وزرائے اعلیٰ اس کے رکن ہوتے ہیں مزید برآں عدالت نے سیکریٹری کابینہ سے اس معاملے پر رپورٹ طلب کرتے ہوئے سماعت 28 مئی تک ملتوی کر دی ہے اور آئندہ پیشی پر پیش رفت رپورٹ جمع کرانے کی ہدایت کی ہے