پیوٹن کی یوکرائن کو جنگ بندی کیلئے مذاکرات کی پیشکش‘ زیلنسکی آمادہ

ماسکو (نیٹ نیوز) روسی صدر ولادیمیر پیوٹن نے یوکرائن کو 15 مئی کو براہ راست مذاکرات‘ میں شریک ہونے کی دعوت دی ہے، جس کے لیے یوکرا ئنی صدر نے بھی رضامندی کا اظہار کر دیا ہے۔ بی بی سی کی رپورٹ کے مطابق روسی صدر پیوٹن نے کہا کہ روس ’سنجیدہ مذاکرات‘ چاہتا ہے، جو پائیدار، مضبوط امن کی طرف بڑھنے کے مقصد کے لیے ہیں۔ پیوٹن نے کہا کہ وہ ’نئی جنگ بندی‘ پر اتفاق کو ’لازمی‘ نہیں کہہ سکتے، روسی رہنما نے کہا کہ تجویز کردہ مذاکرات ترکی کے شہر استنبول میں ہونے چاہئیں۔آج ترکی کے صدر رجب طیب اردوان سے تفصیلات پر بات کریں گے۔ دوسری جانب یوکرائنی صدر ولادومیر زیلنسکی نے استنبول میں بات چیت کی پیوٹن کی دعوت کا جواب دیتے کہا کہ یہ ایک مثبت اشارہ ہے کہ روس نے آخرکار جنگ ختم کرنے پر غور کرنا شروع کر دیا ہے۔ انہوں نے کہا کہ چند دن کے لیے بھی ’قتل‘ جاری رکھنے کا کوئی فائدہ نہیں ہے۔ یوکرائنی صدر نے کہا کہ توقع کرتے ہیں کہ روس مکمل، مستقل، اور قابل اعتماد جنگ بندی کی تصدیق کرے گا، جس کا آغاز کل 12 مئی سے ہوجائے گا، ہم روس سے بات چیت کے لیے تیار ہیں۔