سترہ سالہ علی اسفند سپن باؤلنگ کی دنیا میں نام بنانے کے خواہشمند

لاہور(سپورٹس رپورٹر)سترہ سالہ علی اسفند سپن باؤلنگ کی دنیا میں نام بنانے کے خواہشمند ہیں ۔ فیصل آباد سے تعلق رکھنے والے 17 سالہ علی اسفند نے کرکٹ کے ذریعے دنیا بھر میں نام بنانے کو اپنا ہدف بنا رکھا ہے، بائیں ہاتھ سے باؤلنگ کرنے والے سپنر کا تعلق بھی ان 107 ابھرتے ہوئے ستاروں میں سے ہے جنہیں پی سی بی پاتھ ویز پروگرام کے ذریعے کیرئیر میں آگے بڑھنے کے مواقع فراہم کیے جائیں گے۔علی اسفند نے گزشتہ ڈومیسٹک سیزن میںسنٹرل پنجاب بلیوز کی نمائندگی کرتے ہوئے نیشنل انڈر 19 کپ میں 10 وکٹیں حاصل کرکے بہترین باؤلر کا ایوارڈ حاصل کیا تھا۔ وہ نیشنل انڈر 19 چیمپئن شپ میں بھی 25 وکٹیں حاصل کرکے ٹورنامنٹ کے دوسرے بہترین باؤلر قرار پائے تھے۔17 سالہ سپنر کو خوشی ہے کہ پی سی بی کے پاتھ ویز پروگرام کے ذریعے نوجوان کھلاڑیوں کو 30 ہزار روپے ماہوار وظیفہ اور تعلیمی سکالرشپ دیا جائیگا۔ اس پروگرام نے ان والدین کو انہیں کرکٹ کھیلنے کی اجازت دینے پر راضی کرنے میں اہم کردار ادا کیا ہے۔نوجوان کرکٹر کے مطابق انہیں اکثر پڑھائی چھوڑ کر کرکٹ کھیلنے پر والدین کے غصے کا سامنا کرنا پڑتا تھا،والدین کی خواہش تھی کہ وہ تعلیم حاصل کرکے اپنے مستقبل کو سنواریں تاہم شروع سے ہی ان کا جنون کرکٹ تھا اور وہ اسی کھیل میں اپنا مستقبل بنانا چاہتے ہیں۔ وہ چاہتے ہیں کہ ایسی کرکٹ کھیلیں کہ دنیا انہیں یاد رکھے۔علی اسفند کے مطابق پی سی بی پاتھ ویز پروگرام نے والدین کو انہیں اپنا شوق پورا کرنے دینے پر آمادہ کیا ہے۔ اس سے نہ صرف انہیں اپنی کرکٹ کی صلاحیتوں میں بہتری لانے کا موقع ملے گا بلکہ وہ معیاری تعلیم اور ماہانہ وظیفہ بھی حاصل کرسکیں گے۔ ذوالفقار بابر ان کے آئیڈیل باؤلر ہیں اور وہ تینوں طرز کی کرکٹ، خاص طور پر ٹیسٹ کرکٹ میں پاکستان کی نمائندگی کے خواہشمند ہیں۔