بلوچستانِ خیبرپی کے، گلگت اور کشمیر میں آج بارش،پنجاب میں شدید دھندکاامکان
اسلام آباد (نمائندہ نوائے وقت)محکمہ موسمیات کے مطابق بلوچستان بالائی خیبرپختونخوا، گلگت بلتستان اور کشمیر کے اضلاع میں چند مقامات پر(آج ) اتوار کو بارش اور برف باری متوقع ہے۔ملک کے دیگرعلاقوں میں مطلع ابر آلود رہنے کے ساتھ موسم سرد جبکہ شمالی علاقہ جات میں شدید سرد رہے گا۔ دوسری طرف لاہور سمیت پنجاب کے دیگر علاقوں میں شدید دھند پھیلی ہوئی ہے اور قومی شاہراہ پر حد نگاہ 50میٹر تک رہ گئی ہے۔ پنجاب کے بعض وسطی/جنوبی اضلاع اور بالائی سندھ میں صبح کے وقت دھند پڑ سکتی ہے۔ (آج)اتوار کو موسلا دھار بارش سے تربت، کیچ، پنجگور، قلات کوئٹہ اور ژوب میں طغیانی کا خدشہ ہے۔ کوئٹہ، ہرنائی، زیارت، قلعہ عبد اللہ اور پشین کے اضلاع میں بھی برفباری کا امکان ہے۔ پنجاب کے بیشتراضلاع میں موسم سرد اور مطلع ابر آلود رہنے کے علاوہ بہاولپور،لیہ، ڈی جی خان اورملتان میں ہلکی بارش کا ہو سکتی ہے۔ ملتان، خانیوال، ٹوبہ ٹیک سنگھ، فیصل آباد، ناروال، بہاولپور، ڈی جی خان، سرگودھا، اوکاڑہ اور رحیم یارخان میں صبح کے وقت دھند پڑسکتی ہے۔صوبہ سندھ کے بیشتر علاقوں میں مطلع ابر آلود رہے گا۔ دادو، جیکب آباد اور لاڑکانہ میں ہلکی بارش کا ہوسکتی ہے جبکہ بالائی سندھ کے بعض اضلاع میں دھند پڑے گی۔ کراچی میں سائبیریا کی ہوائوں کے باعث سردی کی لہر برقرار ہے اور آج(اتوار) کو موسم ابر آلود رہے گا۔محکمہ موسمیات کے مطابق خیبرپختونخوا کے بیشتر اضلاع میں مطلع ابر آلود رہنے کے ساتھ چترال، سوات، دیر، ڈی آئی خان ، ٹانک، کرم، وزیرستان اور لکی مروت کے اضلاع میں بارش متوقع ہے۔ لاہور سمیت پنجاب کے دیگر علاقوں میں شدید دھند پھیلی ہوئی ہے اور قومی شاہراہ پر حد نگاہ 50میٹر تک رہ گئی ہے۔ موٹروے ترجمان کے مطابق، موٹروے ایم ۔5 ملتان سے ظاہر پیر اور جلال پور پیروالا ، فیصل آباد سمیت موٹروے کے متعدد سیکشن شدید دھند کی وجہ سے عارضی طور پر بند کر دیئے گئے ہیں۔ قومی شاہراہ پر جمبر، پتوکی، حیب آباد، رینالہ خورد میں شدید دھند ہے اور قومی شاہراہ پر گیمبر، قادر آباد، ساہیوال، ہڑپہ چیچہ وطنی،کسووال، اقبال نگر ،میاں چنوں، خانیوال لودھراں، بستی ملوک ، بہاولپور، احمد پور شرقیہ، ترنڈہ اور ملحقہ علاقے شدید دھند کے لپیٹ میں ہیں۔ ان علاقوں میں شدید دھند کی وجہ سے حد نگاہ انتہائی کم ہے جس کے باعث مسافروں کو شدید مشکلات کا سامنا ہے۔انہوں نے کہا شہر ی سفر سے قبل معلومات کے لئے ہیلپ لائن 130اور ہم سفر ایپ پر رابطہ کر یں۔
