کراچی:کرکٹ کے ایک میچ میں بیٹی کھلاڑی، ماں امپائر
خاتون کھلاڑی کی کامیابی میں ان کی ماں کا بڑا کردار ہوتا ہے، یوں تو عموماً مائیں گراؤنڈ کے باہر ہی بیٹھ کر اپنی بیٹی کا میچ دیکھتی ہیں لیکن کراچی میں جاری ویمنز ٹی ٹوئنٹی کرکٹ ٹورنامنٹ کے دوران ماں اور بیٹی دونوں بیک وقت گراؤنڈ میں ایکشن میں نظر آئیں۔ بیٹی نے میچ کھیلا تو ماں نے امپائر کے فرائض انجام دیئے۔پاکستان کرکٹ ٹیم کی آل راؤنڈر کائنات امتیاز نیشنل اسٹیڈیم میں جاری ٹی ٹوئنٹی ٹورنامنٹ میں پی سی بی ڈائنامائٹس کی نمائندگی کررہی ہیں، جبکہ اسی ٹورنامنٹ میں اْن کی والدہ سلیمہ امتیاز امپائر کے فرائض انجام دے رہی ہیں۔کائنات امتیاز نے اپنی والدہ کی امپائرنگ کے دوران تصاویر سوشل میڈیا پر پوسٹ کرکے لکھا ہے کہ ان کی والدہ نے ہمیشہ اْنہیں سپورٹ کیا ہے۔کائنات امتیاز 12ون ڈے اور 11ٹی ٹوئنٹی میچز میں پاکستان کی نمائندگی کرچکی ہیں۔
