ہاؤسنگ فراڈ‘ سابق سینیٹر وقار احمد کی حفاظتی ضمانت منظور کرنے کی استدعامسترد

لاہور (خبر نگار) لاہور ہائی کورٹ نے چھ ارب روپے کے ہائوسنگ سکینڈل کے ملزم سابق سینیٹر وقار احمد کی ایک روزہ حفاظتی ضمانت منظور کرنے کی استدعا مسترد کر دی۔ بعد ازاں عدالت نے درخواست پر عائد اعتراضات برقرار رکھتے ہوئے درخواست ناقابل سماعت قرار دے دی۔ نجی ہائوسنگ سکینڈل میں چھ ارب روپے کے مبینہ فراڈ کے ملزم سابق سینیٹر وقار احمد خان کی عبوری ضمانت پر سماعت ہوئی۔ سماعت جسٹس فاروق حیدر کی سربراہی میں دو رکنی بنچ کے روبرو ہوئی۔ صدر لاہور ہائیکورٹ بار نے کہا کہ ہم نے درخواست دوبارہ دائر کر دی تھی، مصدقہ کاغذات ساتھ لف نہیں تھے جس بنا پر رجسٹرار آفس نے اعتراض عائد کیا۔ جسٹس فاروق حیدر نے کہا کہ دوبارہ درخواست دائر کرنے کا کیا مقصد ہے، آپ کیا ثابت کرنا چاہتے ہیں کیا ضمانت کی درخواست میں کسی نوٹی فکیشن کو معطل کرنے کی استدعا کی جاتی ہے۔