دہلی (اے ایف پی) بھارت میں خواتین کی ایک غیرسرکاری تنظیم کا کہنا ہے کہ مقبوضہ کشمیر کے علاقے شوپیاں میں گذشتہ برس پراسرار طور پر جو دو خواتین مردہ پائی گئی تھیں اس میں کسی سرکاری ایجنسی کا ہاتھ ہے۔ تنظیم کے مطابق اس معاملے کی تفتیش صحیح طریقہ سے نہیں ہو رہی ہے اس لئے انصاف کی امید کم ہے۔ دہلی میں سرکردہ وکیلوں اور صحافیوں پر مبنی خواتین کی ایک تنظیم ”انڈی پینڈنٹ وومن انیشیٹیو فار جسٹس“ نے کشمیر کا دورہ کرکے شوپیاں میں مردہ پائی گئی خاتون نیلوفر جان اور آسیہ جان کے معاملے کی آزادانہ تفتیش کی ہے۔ دلی میں صحافیوں سے بات چیت کرتے ہوئے تنظیم کی ایک رکن اور سرکردہ وکیل ورندہ گروور نے کہا ”اگر کسی عام آدمی نے یہ واردات انجام دی ہے تو پھر اسے پکڑنا اتنا مشکل کیوں ہے؟ اس معاملے کے ثبوت مٹائے کیوں جا رہے ہیں۔، کس کو بچانے کی کوشش ہو رہی ہے؟“ محترمہ گروور نے کہا کہ ”کشمیر میں فوج اور پولیس یونافائیڈ کمانڈ کے تحت کام کرتے ہیں اور انسانی حقوق کی خلاف ورزیوں میں بھی وہ متحد رہتے ہیں۔