پاک بحریہ کی کمانڈ اینڈ سٹاف کانفرنس  ختم‘ جیو    سٹرٹیجک امور پرتبادلہ خیال

اسلام آباد (خبر نگار خصوصی) پاک بحریہ کی کمانڈ اینڈ سٹاف کانفرنس نیول ہیڈ کوارٹرز اسلام آباد میں اختتام پذیر ہوگئی۔ کانفرنس کی صدارت چیف آف دی نیول سٹاف ایڈمرل نوید اشرف نے کی۔ کانفرنس کے دوران شرکاء نے خطے میں بدلتی ہوئی سمندری صورتحال کا جائزہ اور قومی سلامتی، جیوسٹرٹیجک امور، جنگی تیاریوں اور جوانوں کی تربیت سے متعلق امور پر تبادلہ خیال کیا۔ علاوہ ازیں پاک بحریہ کے جاری منصوبوں اور آئندہ لائحہ عمل کا بھی جائزہ لیا گیا۔ نیول چیف نے میری ٹائم ڈومین میں ممکنہ روایتی اور غیر روایتی خطرات کا مقابلہ کرنے کے لیے مستقل جنگی تیاریوں کو برقرار رکھنے پر زور دیا۔ انہوں نے جدید پلیٹ فارمز اور ٹیکنالوجیز کے حصول میں پاک بحریہ کی کوششوں‘ سرحدوں کی حفاظت کے لیے پاک بحریہ کی آپریشنل تیاریوں پر اعتماد کا اظہار کیا۔ نیول چیف نے کثیرالقومی مشق امن 25 اور امن ڈائیلاگ کے کامیاب انعقاد کو سراہتے ہوئے علاقائی اور عالمی بحری افواج کے درمیان میری ٹائم تعاون کو فروغ دینے میں ان کی اہمیت کو اجاگر کیا۔ کمانڈ اینڈ سٹاف کانفرنس پاکستان بحریہ کا اعلی فیصلہ ساز فورم ہے جس میں چیف آف دی نیول سٹاف کی سربراہی میں پرنسپل سٹاف آفیسرز اور فیلڈ کمانڈرز پاکستان نیوی کی پالیسیوں اور منصوبوں کا جائزہ لیتے ہیں۔