مقامی شو انڈسٹری کو بہتر کر کے برآمدات بڑھائیں گے: چوہدری شافع

لاہور (کامرس رپورٹر) ایکسپو سینٹر لاہور میں گزشتہ روز پاکستان فٹ وئیر ایسوسی ایشن کے زیراہتمام 3 روزہ 10ویں پاکستان فٹ وئیر میٹرئیل اور مشینری شو کا آغاز ہو گیا ہے جو 13 اپریل تک جاری رہے گا۔ صوبائی وزیر صنعت و تجارت چوہدری شافع حسین نے 10ویں پاکستان فٹ وئیر میٹرئیل اور مشینری شو کا افتتاح کیا۔ پاکستان میں اٹلی کی سفیر ماریلینا آرمیلن، صدر گونگ ڈونگ شوز مینوفیکچرنگ ایسوسی ایشن چین مسٹر لیو سولانگ، چیئرمین پاکستان فٹ وئیر ایسوسی ایشن راشد اسلام اور دیگر بھی موجود افتتاحی تقریب میں موجود تھے۔ نمائش میں اٹلی ،چین ،جرمنی، ہانگ کانگ سمیت 22 ممالک سے 400 غیر ملکی سرمایہ کاروں نے شرکت کی۔ نمائش میں 150سے زائد سٹالز لگائے گئے تھے۔ صوبائی وزیر صنعت و تجارت چوہدری شافع حسین نے افتتاحی تقریب سے خطاب اور میڈیا سے گفتگو کرتے ہوئے کہا کہ پنجاب میں فٹ وئیر مینوفیکچرنگ سیکٹر میں سرمایہ کاری کی وسیع گنجائش موجود ہے۔ غیر ملکی فٹ وئیر کمپنیوں کو پنجاب کے صنعتی مراکز میں سرمایہ کاری کی دعوت دیتے ہیں۔ انہوں نے کہا کہ سپیشل  اکنامک زونز میں سرمایہ کاری پر 10سال تک انکم ٹیکس کی چھوٹ اور ایک مرتبہ ڈیوٹی فری مشینری درآمد کی سہولت بھی موجود ہے۔ صوبائی وزیر نے بتایا کہ حکومت  فٹ وئیر سیکٹر میں سرمایہ کاری پر ہرممکن سپورٹ فراہم کرنے کے لئے تیار ہے۔ گارمنٹ  سٹی کی طرح پنجاب میں شو سٹی بنانے کا بھی جائزہ لے رہے ہیں۔ مقامی  شو انڈسٹری کو بھی بہتر کریں گے اور اس کی برآمدات بڑھائیں گے۔ غیر ملکی سرمایہ کار کمپنیاں پنجاب میں سرمایہ کاری کے مواقع سے فائدہ اٹھائیں۔ وزیراعظم نے بجلی کی قیمتوں میں کمی کی ہے جس سے انڈسٹری کو فائدہ ہوگا تاہم بجلی  کے نرخوں میں مزید کمی کی ضرورت ہے۔ چوہدری شافع حسین نے کہا کہ انڈسٹریل اسٹیٹس میں سرمایہ کاروں کو سہولیات کی فراہمی کے لئے مزید اقدامات بھی کئے جا رہے ہیں۔ اٹلی کی سفیر نے اظہار خیال کرتے ہوئے کہا کہ پاکستان میں کاروبارِ کیلئے سازگار ماحول موجود ہے اور اٹلی کی فٹ وئیر سیکٹر سے وابستہ کمپنیاں نمائش میں شریک ہیں۔