لاہور( این این آئی)برصغیر کے مسلمانوں کو علیحدہ تشخص، الگ پہچان اور ایک آزاد ملک کا تحفہ دینے والے بانی پاکستان قائداعظم محمد علی جناحؒ کا 73واں یوم وفات آج( ہفتہ )11ستمبر کو انتہائی عقیدت و احترام سے منایا جائے گا۔ اس دن کی مناسبت مساجد میں بانی پاکستان قائداعظم محمدعلی جناح ؒکی روح کے ایصال ثواب کیلئے قرآن خوانی اور فاتحہ خوانی کی جائے گی ۔ سرکاری اور نجی سطح پر بھی تقریبات کا اہتمام کیا جائے گا جس میں بانی پاکستان قائد اعظم محمد علی جناح ؒ کو خراج تحسین پیش کیا جائے گا اوران کی روح کے ایصال ثواب کیلئے اجتماعی دعا کی جائے گی ۔کراچی میں واقعہ قائد اعظم ؒکے مزار پر اہم شخصیات اور شہری حاضری دیں گے اور اپنے عظیم قائد کو خراج عقیدت پیش کریں گی۔قائد اعظم محمد علی جناح ؒ25 دسمبر 1876 میں کراچی میں پیدا ہوئے۔ انہوں نے ابتدائی تعلیم کا آغاز 1882 میں اپنے آبائی شہر سے کیا اور 1893 میں اعلی تعلیم کے حصول کے لئے انگلینڈ چلے گئے۔ 1896 میں قائد اعظم ؒنے بیرسٹری کا امتحان پاس کیا اور وطن واپس لوٹ آئے۔محمد علی جناح پیشے کے لحاظ سے وکیل تھے اور وطن واپسی کے کچھ عرصہ بعد ہی قائداعظم ؒکا شمار برصغیر کے مایہ ناز قانون دانوں میں کیا جانے لگا تھا۔برصغیر واپسی کے بعد قائداعظم ؒنے سیاست میں باضابطہ طور پر حصہ لیا اور 1906 میں انڈین نیشنل کانگریس میں شمولیت اختیار کی۔ کانگریس کا حصہ بننے کے بعد انہیں اندازہ ہوا کہ یہ جماعت برصغیر کے تمام باسیوں کی نہیں بلکہ صرف ہندوں کی نمائندہ جماعت ہے۔قائداعظم ؒنے 1913 میں آل انڈیا مسلم لیگ میں شمولیت اختیار کی مگر امید کا دامن نہ چھوڑا اور کانگریس کے ساتھ بھی کام کرتے رہے۔ کانگریس کی ہندو نواز پالیسیوں سے تنگ آکر بالآخر 1920 میں قائداعظم ؒنے کانگریس کو خیرآباد کہہ دیا اور آخری سانس تک مسلمانوں کی نمائندہ جماعت مسلم لیگ سے وابستہ اختیار کر لی۔اسی جماعت کی چھتری تلے ہی قائداعظم نے برصغیر کے مسلمانوں کے لیے علیحدہ وطن حاصل کیا۔ محمد علی جناح ؒکو 1937 میں مولانا مظہرالدین نے قائداعظم ؒکا لقب دیا۔ قیام پاکستان کے بعد قائداعظم ؒاس پاک وطن کے پہلے گورنر جنرل بنے اور 11 ستمبر 1948 میں وفات تک اس عہدے پر تعینات رہے۔

ویکسی نیشن اور ماضی میں کوویڈ19 سے دوبارہ بیمار ہونے سے بچانے میں مددگار ہوتے ہیں: تحقیق