امن کیلئے خاموش تھے، دشمن نے حد پار کی تو کڑی ضرب لگائی: مریم نواز

لاہور (نوائے وقت رپورٹ) آپریشن  بْنیَان مَّرصْوص پر وزیراعلی مریم نواز  نے پاک فوج کے لیے اعزاز و افتخار کا اظہار کیا ہے۔ مریم نواز نے پاک فوج کی بھارتی جارحیت کے خلاف عبرتناک جوابی کارروائی پر اظہار تفاخر کرتے ہوئے کہاکہ پاکستان کا بھارت کی بزدلانہ جارحیت کا دن کی روشنی میں دیا گیا جواب تاریخ میں سنہری حروف سے لکھا جائے گا۔ پاک سرزمین کے سپاہیو! تم پر سلام ہو، تمہارے جذبے کو سلام ہو اور تمہاری غیرت کو سلام ہو۔ وزیراعلیٰ مریم نوازشریف نے کہاکہ سلام ہے ان محافظوں کو جنہوں نے صرف گولی سے نہیں بلکہ غیرت، حکمت اور شجاعت سے جواب دیا۔ آپریشن جوابی کارروائی نہیں، تاریخی اعلان ہے کہ ہم کمزور نہیں، امن کے لیے خاموش تھے۔  جب دشمن نے حدپار کی تو پاکستان نے صبر کو حکمت میں بدلااور کڑی ضرب دی۔ پاکستان کاایک ایک سپاہی مادرِ وطن کے تحفظ کی قسم کھا کر زندہ ہے۔ امن کے خواہاں ضرورہیں مگر جارحیت کا جواب خاموشی نہیں، ضرب ہوتا ہے۔ وزیراعلی ٰمریم نوازشریف نے کہاکہ پاکستان کی سرحدیں صرف خاردار تار سے ہی نہیں، شہیدوں کے لہو سے محفوظ ہیں۔ دوسری جانب صوبہ بھر میں 48گھنٹے میں 50ہزار سے زائدرضا کاروں نے شہری دفاع کی ٹریننگ مکمل کرلی۔ وزیر اعلیٰ کی ہدایت پرریسکیو اور سول ڈیفنس کی فرضی مشقیں  ریسکیو1122 کا ٹریننگ پروگرام کامیابی سے جاری ہے۔ سیکرٹری ایمرجنسی سروسز ڈاکٹر رضوان نصیرکی زیر نگرانی صوبہ بھر میں کمیونٹی ایمرجنسی تیاری اوررسپانس ٹریننگ دی جارہی ہے۔ کمیونٹی ایمرجنسی تیاری اوررسپانس ٹریننگ کا دورانیہ چارگھنٹے مقرر کیاگیا۔’’کمیونٹی ایمرجنسی تیاری اوررسپانس ٹریننگ‘‘ پروگرام کے تحت رضا کاروں کی ایمرجنسی سروسزاورسول ڈیفنس بم ڈسپوزل ٹریننگ کے دوران ہنگامی صورتحال میں شہریوں کی ذمہ داریوں اورسوشل میڈیا سے متعلق آگاہی دی جارہی ہے اور ہنگامی صورتحال میں بچاؤ اورمیڈیکل کٹ کے استعمال کے بارے میں بتایا جاتاہے۔  رضا کاروں کو ہنگامی حالات میں خون کے بہاؤکو کنٹرول کرنے کے طریقہ کار سے بھی آگاہ کیا جاتا ہے اور رضاکارو ں کو فریکچر مینجمنٹ اور سی پی آر کی ٹریننگ دی جاتی ہے’’کمیونٹی ایمرجنسی تیاری اوررسپانس ٹریننگ‘‘ میں ایمرجنسی وارننگ اورسائرن کے طریقہ کارسے آگاہ کیا جاتا ہے ۔’’کمیونٹی ایمرجنسی تیاری اوررسپانس ٹریننگ‘‘ کے لئے شہری موبائل ایپلی کیشن اورویب پورٹل کے ذریعے بھی اپلائی کر سکتے ہیں،کمیونٹی گروپس کے لئے آن لائن com@rescue.gov.pk پر گھر بیٹھے اپلائی کیا جا سکتا ہے وزیراعلی مریم نوازشریف نے کہاکہ سول ڈیفنس ٹریننگ کا مقصد عوام کو ہنگامی حالت سے نمٹنے کے قابل بناناہے۔صوبہ بھر میں طلبہ اورمختلف مکاتب فکر کے لوگوں کو لائف سیونگ اورہنگامی انخلاء  کی ٹریننگ بھی دی جارہی ہے۔ قوم ہر قسم کے حالات سے نمٹنے کیلئے ہمہ وقت تیار ہے۔