ریاستی تحفظ کو ہر شے پر مقدم سمجھنا ہمارا  دینی وقومی فریضہ ہے :مفتی عبد الخالق آزاد 

لاہور (خصوصی نامہ نگار) خانقاہ عالیہ رحیمیہ رائے پور کے سجادہ نشین مفتی عبد الخالق آزاد رائے پوری نے خطبہ جمعہ کے بعد خصوصی نشست میں پاکستان اور بھارت کے مابین ممکنہ جنگی تنازع پر گفتگو کرتے ہوئے کہا کہ پاکستان کے تحفظ اور سالمیت کی بات کرنا بطور پاکستانی ہمارا مذہبی، دینی وقومی فریضہ ہے۔ ہمیں اس ریاست کی حفاظت و بقاء کو ہر ذاتی، گروہی یا سیاسی وابستگی سے بالاتر سمجھنا چاہئے ۔انہوں نے کہا بعض افراد حکومت سے اختلاف کے باعث ریاستی سالمیت کے خلاف بات کرتے ہیں۔ ایسی سوچ نہ صرف غیر ذمہ دارانہ ہے بلکہ قومی وحدت و سلامتی کیلئے خطرناک بھی ہے۔انہوںنے زور دیا کہ تمام اہل وطن کو چاہیے کہ وہ اپنی ذمہ داریوں کا ادراک کریں اور ریاست کی بقا اور خودمختاری کیلئے متحد ہو کر اپنا کردار ادا کریں۔