آرمی چیف کی وزیراعظم سے ملاقات، ملک کی مجموعی سیکیورٹی صورتحال پر بات چیت
وزیراعظم عمران خان سے آرمی چیف جنرل قمر جاوید باجوہ نے ملاقات کی ۔ ملاقات میں سکیورٹی صورتحال، مچھ سانحہ اور مقبوضہ کشمیر کی صورتحال پر تفصیلی گفتگوکی گئی۔ وزیراعظم سے جاری اعلامیہ کے مطابق وزیراعظم عمران خان سے آرمی چیف جنرل قمر جاوید باجوہ کی اہم ملاقات میں قومی سلامتی اور مچھ سانحہ پر تبادلہ خیال کیا گیا۔ملاقات میں ڈی جی آئی ایس آئی لیفٹیننٹ جنرل فیض حمید بھی موجود تھے۔ ملاقات میں سانحہ مچھ کی شدید الفاظ میں مذمت اور ذمہ داروں کو کیفر کردار تک پہنچانے کا عزم کیا گیا۔ ملاقات میں لائن آف کنٹرول پر بھارتی فورسز کی جانب سے فائر بندی معاہدے کی خلاف ورزیوں اورمقبوضہ کشمیر میں انسانی حقوق کی خلاف ورزیوں پر بھی گفتگو کی گئی۔خیال رہے اس سے قبل ڈی جی آئی ایس پی آر نے بھی پریس کانفرنس کی تھی جس میں انہوں نے بھارت کی جانب سے ایل او سی پر اشتعال انگیزی اور ملکی سکیورٹی صورتحال پر بریفنگ دی۔
