پیپلز پارٹی کے مرکزی رہنما اور سابق وفاقی وزیر داخلہ میجر جنرل ریٹائرڈ نصیر اللہ خان بابر 82 سال کی عمر میں انتقال کر گئے
پشاور / اسلام آباد / لاہور (ایجنسیاں + نمائندہ خصوصی + خصوصی نامہ نگار) پیپلز پارٹی کے مرکزی رہنما اور سابق وفاقی وزیر داخلہ میجر جنرل ریٹائرڈ نصیر اللہ خان بابر طویل علالت کے بعد 82 سال کی عمر میں انتقال کر گئے۔ اڑھائی سال قبل نصیر اللہ بابر پر فالج کا حملہ ہوا تھا جس کے بعد وہ مسلسل زیر علاج تھے۔ پیر کی علی الصبح وہ ایم ایچ ہسپتال پشاور میں خالق حقیقی سے جا ملے۔ مرحوم کو فوجی اعزاز کے ساتھ ان کے آبائی گاﺅں میں سپرد خاک کر دیا گیا۔ نماز جنازہ میں پیپلز پارٹی کے رہنماﺅں جماعت اسلامی کے رہنما قاضی حسین احمد سمیت ہزاروں افراد نے شرکت کی۔ نصیر اللہ بابر 1928ء میں اکوڑہ خٹک نوشہرہ کے قریب اسماعیل خیل کے گاﺅں پیرپیائی میں پیدا ہوئے۔ قیام پاکستان کے بعد 1948ءپاک فوج میں شمولیت اختیار کر لی۔ 1965ء اور 1971ءپاکستان کی بھارت جنگ میں شاندار کارکردگی پر نصیر اللہ بابر کو ڈبل ستارہ جرات اور ہلال جرات کے اعزاز سے نوازا گیا۔انہوں نے فوج میں میجر جنرل اور آئی جی فرنٹیئر کور سمیت کئی اہم عہدوں پر خدمات انجام دیں۔ فوج سے ریٹائرمنٹ کے بعد نصیر اللہ بابر یکم مارچ 1976ءسے 6 جولائی 1977ء تک صوبہ خیبر پی کے کے گورنر رہے۔ 1977ءمیں انہوں نے پیپلز پارٹی میں شمولیت اختیار کی‘ بے نظیر بھٹو کے پہلے دور حکومت میں وہ وزیراعظم کے معاون خصوصی رہے۔ 1993ء میں قومی اسمبلی کے رکن منتخب ہوئے اور 1996ء تک وفاقی وزیر داخلہ کی حیثیت سے خدمات انجام دیں۔ اسلام آباد میں سکول بس کے اغوا میں بچوں کو بحفاظت چھڑانے پر انہیں تمغہ پاکستان دیا گیا۔ افغانستان میں طالبان حکومت کے قیام اور کراچی آپریشن میں ان کا کردار اہم رہا۔ ان کی وفات پر صدر آصف علی زرداری‘ وزیراعظم یوسف رضا گیلانی‘ سپیکر و ڈپٹی سپیکر قومی اسمبلی‘ چیئرمین سینٹ‘ رضا ربانی‘ وزیر داخلہ رحمن ملک‘ وزیر اطلاعات قمر الزمان کائرہ‘ مسلم لیگ ن کے قائد نواز شریف‘ قاضی حسین احمد‘ جماعت اسلامی کے امیر منور حسن‘ لیاقت بلوچ سمیت سیاسی و مذہبی قائدین نے نصیر اللہ بابر کے انتقال پر گہرے رنج و غم کا اظہار کیا اور لواحقین کے لئے یہ صدمہ برداشت کرنے اور مرحوم کی روح کے ایصال ثواب کے لئے دعا کی۔ صدر اور وزیراعظم نے اپنے الگ الگ تعزیتی پیغامات میں کہا کہ نصیر اللہ بابر پیپلز پارٹی کے اہم اثاثہ اور قابل احترام رہنما تھے۔ انہوں نے پیپلز پارٹی اور ملک کے لئے گراں قدر خدمات انجام دیں۔
