بنگلہ دیش : حسینہ واجد کے حامیوں کا طلبہ پر جواب ، ملک گیرآپریشن ،1308شرپسند گرفتار

 ڈھاکہ (آئی این پی) بنگلہ دیش کی حکومت نے سابق معزول وزیراعظم حسینہ واجد کے حامیوں کی جانب سے طلبہ پر حملے کے بعد ملک بھر میں آپریشن ’’ڈیول ہنٹ‘‘ کا باقاعدہ آغاز کرتے ہوئے 1308 شرپسندوں کو گرفتار کرلیا۔ مقامی میڈیا رپورٹس کے مطابق بنگلہ دیش کی وزارت داخلہ کی جانب سے جاری بیان میں کہا گیا ہے کہ آپریشن ’’ڈیول ہنٹ‘‘ شروع ہونے کے بعد سے اب تک ملک کے مختلف حصوں سے کم از کم 1308 شرپسندوں کو گرفتار کیا جا چکا ہے۔ اسسٹنٹ انسپکٹر جنرل پولیس انعام الحق ساگر نے گرفتاریوں کی تصدیق کی ہے۔ قبل ازیں بنگلہ دیش کی حکومت کے ایک سرکاری بیان میں کہا گیا کہ یہ کارروائی اس وقت شروع کی گئی، جب سابق آمرانہ حکومت سے تعلق رکھنے والے گروہوں نے طلبہ کے گروپ پر حملہ کیا، جس میں وہ شدید زخمی ہو گئے۔ اگست 2024 ء میں طلبہ کی قیادت میں انقلاب کے بعد حسینہ واجد کی برطرفی کے نتیجے میں اقتدار سنبھالنے والی عبوری حکومت میں وزارت داخلہ کے سربراہ جہانگیر عالم چوہدری نے اسے آپریشن ’’ڈیول ہنٹ‘‘ کا نام دیا ہے۔ انہوں نے صحافیوں کو بتایا کہ یہ آپریشن اس وقت تک جاری رہے گا، جب تک ہم شیطانوں کو جڑ سے اکھاڑ نہیں دیتے، کئی دنوں کی بدامنی کے بعد بڑے پیمانے پر سکیورٹی آپریشن کیے گئے۔