خامیوں پر قابو پانے کی کوشش ، اب ہمارا فوکس کمبی نیشن پر ہے ‘ انضمام الحق

11 فروری 2018

لاہور (آن لائن)قومی ٹیم کے چیف سلیکٹر و پی ایس ایل کی ٹیم لاہور قلندر کے مینٹور انضمام الحق نے کہا ہے کہ ماضی کی خامیوں پر قابو پانے کی کوشش کر رہے ہیں، اس مرتبہ ہمارا فوکس کمبی نیشن پر ہے اور جب کھلاڑی کو اس کی جاب کا پتہ ہوگا تو وہ زیادہ بہتر پرفارمنس دے گا۔ ان خیالات کا اظہار انہوں نے لاہور قلندر کے کھلاڑیوں کے باغ جناح میں لگائے گئے تربیتی کیمپ میں گفتگو کرتے ہوئے کیا۔اس موقع پر انضمام الحق نے کھلاڑیوں کو ٹریننگ کے ساتھ کھیل میں نکھار لانے کے لئے ٹپس بھی دیں۔ انضمام الحق نے کہا کہ پی ایس ایل اور ٹیلنٹ ہنٹ پروگرام سے بہترین کھلاڑی میسر آئے ہیں اوراب ہمارا ا س پر فوکس ہے۔ انہوںنے کہا کہ لاہور قلندر اپنی ماضی کی غلطیوں پر قابو پا کر انہیں سدھارنے کی جانب گامزن ہے۔ اس مرتبہ ہماری کوشش ہے کہ اچھا کمبی نیشن بنے کیونکہ جب ایسا ہوگا تو ہر کھلاڑی کو اپنی جاب کا معلوم ہوگا اور وہ زیادہ بہتر پرفارمنس دے گا۔