بیلجیئم کے علاقہ شالروا کے معروف سیاسی و سماجی رہنما ندیم بھٹی نے اپنے ایک بیان میں کہا ہے کہ نامعلوم امریکی المعروف ریمنڈ ڈیوس اس وقت میڈیا کی توجہ کا مرکز بنا ہوا ہے جسے عدالتی تاریخوں کے دوران دکھا کر نمائش کی جا رہی ہے جبکہ اعلیٰ عدلیہ اور حکومتی اراکین سارے حقائق اور ثبوت ہونے کے باوجود کوئی بھی فرد جرم عائد کرنے سے قاصر ہے۔ انہوں نے کہا کہ کتنی عجیب بات ہے کہ امریکہ کے اندر بسنے والے پاکستانی شہری امریکی شہریت ہونے کے باوجود اگر ٹیلی فون کالز پر یا ویسے کسی پبلک پلیس پر مذاقاً اسامہ بن لادن کی بات کریں یا پاکستان سمیت کسی بھی جگہ بم دھماکوں پر تبصرہ کریں تو انہیں CIA فوراً گرفتار کر کے کئی کئی سال قید کر دیتی ہے یا دختر پاکستان ڈاکٹر عافیہ صدیقی جیسی معصوم عورت کے ساتھ بغیر فرد جرم عائد کئے اسے 85 سال کی قید سنا دیتی ہے یا حکومت پاکستان سے بھی شہری کو اٹھا لے جا کر اپنے ملک میں قید کر دیتی ہے اور دوسری جانب پاکستان میں قائم امریکی سفارت خانہ کے عملے کو اسلحہ رکھنے اور پاکستانی شہری مارنے کے باوجود بھی کوئی کارروائی نہیں ہوتی۔ انہوں نے کہا کہ امریکی شہری اندرون لاہور کیا لینے گیا تھا کہ اسے تین نوجوانوں پر فائرنگ کرنے کی ضرورت محسوس ہوئی۔ ندیم بھٹی نے کہا کہ سارے کھیل کے پیچھے لاتعداد خفیہ مسائل شمار ہیں جنہیں منظر عام پر نہیں لایا جا رہا۔ انہوں نے کہا کہ دو کروڑ سے زائد اوورسیز کمیونٹی تین قاتلوں کے امریکی مجرم کی پر زور مذمت کرتے ہوئے حکومت سے مطالبہ کرتی ہے کہ قاتلوں کو پھانسی کی سزا سنائی جائے۔