جنوبی پنجاب صوبہ محاذ میں مزید شخصیات کی شمولیت کا امکان

11 اپریل 2018

میلسی( خبر نگار) جنوبی پنجاب صوبہ محاذ میں مزیدشخصیات کی شمولیت کا امکان، پاکستان پیپلز پارٹی سمیت دیگر جماعتیں بھی جنوبی پنجاب صوبہ محاذ کی حمایت کا اعلان کریںگی۔ ذرائع کے مطابق ایک درجن سے زائد اراکین اسمبلی اور پارٹی عہدیداران جلد جنوبی پنجاب صوبہ محاذ میں شمولیت کا اعلان کریں گے۔ ان میں ضلع ڈیرہ غازی خان، ضلع راجن پور، ضلع وہاڑی، ضلع خانیوال سمیت دیگر علاقوں کے پیپلز پارٹی ، پاکستان مسلم لیگ(ن) اور تحریک انصاف کے کچھ اراکین اسمبلی اور عہدیداران کے نام سامنے آرہے ہیں۔ جبکہ سیاسی مبصرین کا یہ کہنا ہے کہ جنوبی پنجاب صوبہ محاذ کا قیام انتخابات سے چند روز قبل ہونا پاکستان پیپلزپارٹی کی ایک چال ہوسکتی ہے کیونکہ انہیں تیر کے نشان پر کامیابی کا حصول پنجاب میں زمینی حقائق کے مطابق ناممکن نظر آ رہا ہے۔ ملتان میں بلاول ہائوس کا قیام اور اس موقع پر جنوبی پنجاب کی بلاول بھٹو کا اعلان اس کی واضح دلیل ہے۔ ذرائع کا بھی یہی کہنا ہے کہ پیپلزپارٹی سمیت دیگر جماعتیں جنوبی پنجاب صوبہ محاذ کے پلیٹ فارم کی نہ صرف حمایت کا اعلان کریں گے بلکہ اتحاد بھی بنائیں گے۔