اوورسیز پاکستانیوں کو ووٹ کا حق دینے کے حوالہ سے پریزنٹیشن کل دی جائیگی

11 اپریل 2018

اسلام آباد(خصوصی نمائندہ)الیکشن کمیشن آف پاکستان نے بیرون ملک مقیم پاکستانیوں کو ووٹ کا حق دینے کے حوالہ سے پارلیمنٹ اور صوبائی اسمبلیوں میں نمائندگی رکھنے والی سیاسی جماعتوںکو پریزنٹیشن دینے کیلئے خطوط ارسال کر دیئے ہیں۔ الیکشن کمیشن کی جانب سے جاری بیان کے مطابق سپریم کورٹ آف پاکستان کے 3 اپریل 2018ء کے فیصلہ کی روشنی میں 12 اپریل کو سہ پہر ساڑھے تین بجے سپریم کورٹ آڈیٹوریم ہال میں نادرا کی جانب سے بیرون ملک پاکستانیوں کو ووٹ کا حق دینے کے حوالہ سے طریقہ کار پر پریذنٹیشن دی جائے گی۔ اس حوالہ سے الیکشن کمیشن آف پاکستان نے پارلیمنٹ اور صوبائی اسمبلیوں میں نمائندگی رکھنے والی سیاسی جماعتوں کو خطوط ارسال کر دیئے ہیں کہ ہر سیاسی جماعت اپنے دو، دو نمائندے اس پریزنٹیشن کے مشاہدے کیلئے مقرر کرے۔