سرکاری سکیم کے تحت 5ہزار خالی حج نشستوں پر آج درخواستیں طلب

اسلام آباد(خبرنگار)وزارت مذہبی امور نے سرکاری سکیم کے تحت 5ہزار خالی حج نشستوں پر آج درخواستیں طلب کر لیں۔ وزارت مذہبی کے ترجمان کے مطابق 5ہزار خالی نشستوں پر وزارت مذہبی امور نے پہلے آئیے اور پہلے پائیے کی بنیاد پر درخواستیں طلب کی ہیں حج کے خواہش مند جو افراد پہلے درخواست دینے سے رہ گئے تھے وہ اب اس سکیم سے فائدہ اٹھا سکتے ہیں۔ 5 ہزار کی تعدادپوری ہونے پر درخواستوں کی وصولی روک دی جائے گی۔ترجمان کا کہنا ہے کہ تمام نامزد بینک روزانہ کی بنیاد پر جمع درخواستوں کو پورٹل پر فوری اپ لوڈ کرنے کے پابندہوں گے۔ نئے درخواست گزار پہلی 2 قسطوں کی مد میں 6 لاکھ روپے جمع کرائیں گے۔ قربانی یا الگ کمرے کے اضافی اخراجات ہوں گے۔