مسلم لیگ (ن) کے سینئر رہنما خواجہ آصف کا کہنا ہے کہ عمران خان کے لہجے سے محسوس ہوتا ہے کہ وہ انتہائی پریشان ہیں اور سیاسی لوگ ہر وقت الیکشن کے لیے تیار رہتے ہیں۔

سیالکوٹ میں اپنی رہائشگاہ پر میڈیا سے بات کرتے ہوئے خواجہ آصف نے کہا کہ حکومت خود اپنی دشمن ہے، بیورو کریسی کو کام نہیں کرنے دیا جا رہا عمران خان نے 6 ماہ کے دوران اپنے ارشادات کی نفی کے سوا کچھ نہیں کیااور گزشتہ چھ ماہ میں حکومت نے صرف پرانے منصوبوں پر تختیاں ہی لگائی ہیں۔

انہوں نے کہا کہ  نظام کو خطرہ ہے اور ہمیں تحفظات ہیں پھر بھی چاہتے ہیں نظام چلے، حکومت نوٹ چھاپ رہی ہے اور اب تک 1400 ارب چھاپ چکی ہے۔

خواجہ آصف نے کہا کہ عمران خان جو 22 سال تک کہتے رہے اس پر عملدرآمد نہیں کیا، اب انہیں اکنامک ایڈوائزر بھی چھوڑ کر جارہے ہیں، پہلی مرتبہ ایک وزیراعطم آئی ایم ایف کے پاس جارہا ہے، انہوں نے کہا تھا کہ آئی ایف کے پاس جانے سے بہتر ہے خودکشی کرلوں۔

رہنما (ن) لیگ کا کہنا تھا کہ شہباز شریف کو پبلک اکاؤنٹس کمیٹی (پی  اے سی) کی چئیرمین شپ سے ہٹانے کا فائدہ نہیں ہوگا بلکہ اس سے حالات بگڑیں گے اور ہم کنٹینروں پر نہیں چڑھنا چاہتے، ہم بھی اس نظام کو منجمد کر سکتے ہیں۔

خواجہ آصف نے کہا کہ خارجہ پالیسی بھی درست سمت میں نہیں، ایک وزیر کہہ رہا تھا کہ کلبھوشن کو بھیج دیا گیا ہے، جیسا وزیراعظم ویسے ہی ان کے وزیر ہیں، ڈر ہے کہ کہیں دیرینہ دوست ہم سے ناراض نہ ہو جائیں۔ 

مسلم لیگ (ن) کے رہنما کا مزید کہنا تھا کہ این آر او صرف وزیراعظم کی ہمشیرہ کو ملا ہے، حکومت میاں نواز شریف کی بیماری کا فائدہ اٹھانا چاہتی ہے، دل کے مرض کے لیے ڈاکٹر کے بورڈ کی رائے کو تسلیم کیا جائے۔

سابق وزیر دفاع خواجہ آصف کا کہنا تھا کہ نواز شریف کی صحت کے بارے میں تاثر دینے کی کوشش کی جارہی ہے کہ شاید ہم کوئی رعایت چاہتے ہیں، ڈاکٹروں کی رپورٹ کے مطابق میاں صاحب کو دل کی تکلیف ہے، حکومت نواز شریف کی بیماری کو ایشو بنا کر سیاسی فائدہ اٹھانا چاہتی ہے، حکومت میں بیٹھے لوگ خود اپنی ساکھ خراب کر رہے ہیں ان کو کسی دشمن کی ضرورت نہیں۔انہوں نے کہا کہ نواز شریف کو فوری پنجاب کارڈیالوجی میں داخل کروایا جائے، اگر پرسوں نواز شریف کی ضمانت ہوگئی تو پھر بیرون ملک سے علاج کروانے کا سوچیں گے۔

خواجہ آصف نے کہا کہ حکومت 6 ڈاکٹروں کی رپورٹ پر عملدرآمد یقینی بنائے، نواز شریف کو دل کے اسپتال منتقل کیا جائے، وزیراعظم نے کل جو زبان استعمال کی اس سے ان کی جنجھلاہٹ نظر آرہی ہے، 6 مہینے کے دوران وزیراعظم عوام کو کوئی سہولت فراہم نہی کرسکے۔