اسلام آباد (ثناءنیوز) قومی اسمبلی میں قائد حزب اختلاف چودھری نثار علی خان نے کہا ہے کہ اپوزیشن جماعتوں میں اتنی ہم آہنگی نہیں ہے کہ حزب اختلاف کا متحدہ فرنٹ بن سکے۔ سیاستدانوں کو باہر سے اپنا کاروبار واپس لانے کے لئے کوئی اصولی راستہ اختیار کرنا چاہئے۔ عسکری قیادت کی پالیسیوں سے اختلاف کرنا ساری فوج پر تنقید کے مترادف نہیں ہے۔ سیاستدان، فوج اور عدلیہ سب کو اپنے طور طریقے تبدیل کرنا ہوں گے۔ ان کے انٹرویو کی مزید تفصیلات کے مطابق چودھری نثار نے کہا کہ قومی ایشوز کے حوالے سے ہم موجودہ حکومت سے متعلق کسی خوش فہمی میں مبتلا نہیں ہیں۔ ہماری پارٹی کے قائد میاں نوازشریف کی جانب سے تجویز کردہ 10 نکاتی قومی ایجنڈے پر عملدرآمد کے لئے حکومت کے پاس 15 دنوں کی مہلت رہ گئی ہے۔ بہت زیادہ توقعات رکھنے والا شخص ہی یہ کہہ سکتا ہے کہ حکومت عملدرآمد کو ممکن بنا دے گی۔ بہتر طرز حکمرانی کے حوالے سے حکومت آگے بڑھنے کے سلسلے میں بالکل ہی سنجیدہ اور مخلص نظر نہیں آ رہی ہے۔ کابینہ جو کہ تبدیلی کے حوالے سے سب سے کم آسان طریقہ تھا اس کے حوالے سے فیصلہ کیا گیا مگر اس کی عملی صورت کیا ہو گی ابھی تو یہ سامنے آنا باقی ہے۔ حکمران زبانی کلامی تو بہت اچھے طریقے سے وعدے کر لیتے ہیں مگر عمل کے حوالے سے کارکردگی نہ ہونے کے برابر ہے۔ شاید حکومت کے نزدیک وعدہ کرنا اور اس سے مکر جانا کوئی بڑی بات نہیں ہے۔ چودھری نثار نے کہا کہ اس وقت قومیت پرست جماعتوں کے رابطے سب سے زیادہ مسلم لیگ (ن) کے ساتھ ہیں۔ انہوں نے کہا کہ لندن کی آل پارٹینر کانفرنس میں ہونے والی متفقہ قرارداد میں یہ نکتہ بھی شامل تھا کہ ایم کیو ایم کے ساتھ کوئی سیاسی جماعت تعلقات نہیں رکھے گی۔ پیپلز پارٹی بھی اس قرار داد کی منظوری کے حوالے سے پیش پیش تھی۔ بدقسمتی سے ایم کیو ایم نے سیاسی جماعتوں کے ساتھ خلیج کو مزید بڑھانے میں کردار ادا کیا۔ اس ساری صورت حال کے باوجود خواہ ایم کیو ایم ہو ، جے یو آئی (ف) یا دیگر اپوزیشن جماعتیں ہوں ان کے ساتھ قومی اسمبلی میں ہمارا رابطہ ہے۔